تحریک انصاف کی سیاسی کمیٹی نے فواد چوہدری کی جانب سے شعیب شاہین کو تھپڑ مارنے کی مذمت کرتے ہوئے کہا ہے کہ انہوں نے مجرمانہ فعل کیا۔
تحریک انصاف کی سیاسی کمیٹی کا اجلاس ہوا، جس میں فواد چوہدری کے رویے پر مذمتی اعلامیہ جاری کیا گیا، پی ٹی آئی کا کہنا ہے کہ سابق وفاقی وزیر فواد چوہدری کی جانب سے شعیب شاہین کو تھپڑ مار کر مجرمانہ فعل کیا گیا، سیاسی کمیٹی کی جانب سے فواد چوہدری کے شعیب شاہین کو تھپڑ مارنے کی مذمت کی گئی۔
مذمتی اعلامیے میں پی ٹی آئی کا کہنا ہے کہ فواد چوہدری کا شعیب شاہین پر بلااشتعال حملہ حیوانی جبلت کا اظہار ہے، شعیب شاہین پر اٹھایا جانے والا ہاتھ پوری پی ٹی آئی پر طمانچہ ہے۔
پی ٹی آئی کا کہنا ہے کہ راہِ فرار اختیار کرنیوالے بزدل اور سیاسی غدار سے یہی توقع ہے، پی ٹی آئی سیاسی کمیٹی شعیب شاہین سے اظہار یکجہتی اور مکمل سپورٹ کرتی ہے۔
اعلامیے کے مطابق فواد چوہدری خود کو کسی بھی فورم پر پی ٹی آئی نمائندے کے طور پر پیش کرنے کے مجاز نہیں۔
فواد چوہدری نے پی ٹی آئی سیاسی کمیٹی اور اس کے اعلامیے کو دو ٹکے کا قرار دے دیا، ٹوئٹ میں انہوں نے کہا کہ دو ٹکے کی پی ٹی آئی کی سیاسی کمیٹی ایک غیر اہم کلرک کے معاملے پر قرارداد لے آئی۔
فواد چوہدری کا مزید یہ کہنا تھا کہ سیاسی کمیٹی کے اکثر لوگ ایک دن کیلئے جیل نہیں گئے، کروڑوں روپے کے فنڈ کھا گئے۔
