شراب و اسلحہ کیس: علی امین گنڈاپور کی گرفتاری کے احکامات بدستور قائم

اسلام آباد، ضلعی و سیشن عدالت اسلام آباد نے شراب اور اسلحہ برآمدگی کیس میں وزیراعلیٰ خیبرپختونخوا علی امین گنڈاپور کے وارنٹ گرفتاری برقرار رکھنے کا فیصلہ دیا ہے۔

کیس کی سماعت جوڈیشل مجسٹریٹ مبشر حسن چشتی نے کی، جس میں علی امین گنڈاپور کے وکیل نے عدالت کو بتایا کہ ان کے موکل کو پشاور ہائی کورٹ سے ضمانت حاصل ہے اور انہوں نے بریت کی درخواست دائر کر رکھی ہے، جس کی سماعت کے لیے علی امین گنڈاپور کی ذاتی حاضری ضروری نہیں۔

عدالت نے وکیل کے دلائل سننے کے بعد وارنٹ گرفتاری برقرار رکھنے کا حکم دیتے ہوئے کیس کی مزید کارروائی 26 اپریل تک ملتوی کر دی۔

یاد رہے کہ علی امین گنڈاپور کے خلاف یہ مقدمہ تھانہ بھارہ کہو میں درج ہے، جس میں ان پر شراب اور غیر قانونی اسلحہ کی برآمدگی کا الزام عائد کیا گیا ہے۔