سکیورٹی فورسز اور دہشتگردوں کے درمیان جھڑپ، کالعدم ٹی ٹی پی کمانڈر ہلاک

ہنگو میں سکیورٹی فورسز اور دہشتگردوں کے درمیان فائرنگ کے تبادلے میں کالعدم ٹی ٹی پی کا کمانڈر سعید مارا گیا، جبکہ اس کا ساتھی فرار ہونے میں کامیاب ہوگیا۔

جنوبی وزیرستان کے علاقے تورہ گولہ میں فائرنگ کے نتیجے میں ایک پولیس اہلکار شہید ہوگیا۔ ڈی پی او کے مطابق شہید اہلکار عمران پولیس لائن وانا میں تعینات تھا۔

ادھر ٹانک میں ڈیورنڈ گیٹ کے قریب پولیس چوکی پر دہشتگردوں نے حملہ کیا، تاہم فورسز کی بروقت جوابی کارروائی کے بعد حملہ آور فرار ہوگئے۔

اسی طرح ڈی آئی خان کے علاقے رتہ کلاچی میں پولیس اور سی ٹی ڈی کی مشترکہ کارروائی میں ایک دہشتگرد ہلاک ہوگیا، جبکہ کرک کے بہادر خیل پہاڑی سلسلے میں پولیس اور سی ٹی ڈی نے دہشتگردوں کی پناہ گاہوں کو تباہ کر دیا۔