سوشل میڈیا اور بالخصوص عرب صارفین میں ان دنوں کرکل (caracal) نامی جنگلی بلی بہت مقبول ہورہی ہے اور اسے غزہ جنگ سے بھی جوڑا جارہا ہے۔۔
حال ہی میں سوشل میڈیا، خصوصاً عرب صارفین میں کرکل (Caracal) نامی جنگلی بلی غیر معمولی طور پر مقبول ہوگئی ہے، اور اس کا تعلق غزہ جنگ سے بھی جوڑا جارہا ہے۔
میڈیا رپورٹس کے مطابق، یہ بحث اس وقت شروع ہوئی جب منگل کے روز مصر کی سرحد کے قریب اسرائیلی زیر قبضہ صحرائے نقب میں جبل حریف کے علاقے میں ایک جنگلی بلی نے اسرائیلی فوجیوں پر حملہ کرکے انہیں زخمی کردیا۔ بعد ازاں، اسرائیلی حکام نے اس بلی کو پکڑ کر وائلڈ لائف اسپتال منتقل کردیا۔
یہ واقعہ سوشل میڈیا پر تیزی سے وائرل ہوگیا اور عرب صارفین نے مزاحیہ تبصروں اور میمز کے ذریعے اسے فلسطینی مزاحمت کی علامت بنا دیا۔ کچھ نے اس بلی کو ’حماس کا خفیہ رکن‘ قرار دیا، جبکہ دیگر نے اسے فلسطینیوں کے خلاف اسرائیلی جارحیت کا قدرتی جواب کہا۔ یہاں تک کہ کچھ صارفین نے اس بلی کا موازنہ مصری سپاہی محمد صلاح سے کیا، جس نے 2023 میں اسرائیلی فوجیوں پر حملہ کیا تھا۔
جنگلی بلی کی مصنوعی ذہانت سے تیار کردہ تصاویر— اسکرین گریب/ ایکس
مصنوعی ذہانت سے بنائی گئی تصاویر میں اس جنگلی بلی کو فلسطینی پرچم کے ساتھ یا اسرائیلی فوجیوں پر حملہ کرتے ہوئے دکھایا گیا ہے، جبکہ بعض صارفین نے مذاق میں کہا کہ اسرائیل اب ’ہزاروں جنگلی بلیوں کو گرفتار کرے گا‘۔
یہ پہلا موقع نہیں کہ اسرائیلی فوج کو جنگلی حیات کے حملے کا سامنا کرنا پڑا ہو۔ مئی 2023 میں، غزہ میں ایک اسرائیلی ٹینک حادثاتی طور پر بھڑوں کے چھتے پر چڑھ گیا تھا، جس کے نتیجے میں بھڑوں کے حملے میں 12 فوجی زخمی ہوگئے تھے۔
