سوشل میڈیا پر افواہیں پھیلانے والے ہو جائیں خبردار کیونکہ وفاقی کابینہ نے سوشل میڈیا پر پراپیگنڈہ کرنے اور افواہیں پھیلانے والوں کے گرد گھیرا مزید تنگ کر دیا ہے۔
وفاقی کابینہ نے سوشل میڈیا پر پراپیگنڈہ، ہراسانی، اور افواہیں پھیلانے والوں کے خلاف سخت اقدامات اٹھاتے ہوئے نیشنل سائبر کرائمز انویسٹی گیشن ایجنسی (NCCIA) کے رولز کی منظوری دے دی ہے۔ ان رولز کے تحت ریاستی اداروں اور سرکاری شخصیات کے خلاف پراپیگنڈہ کرنے والوں کے خلاف سخت کارروائی کی جائے گی۔
ذرائع کے مطابق، سائبر کرائمز میں ملوث افراد کو 5 سے 15 سال تک قید اور بھاری جرمانوں کا سامنا کرنا پڑے گا۔
ذرائع نے مزید بتایا کہ 11 ماہ بعد این سی سی آئی اے کو مکمل اختیارات کے ساتھ فعال کر دیا گیا ہے، اور اب یہ ایجنسی سائبر کرائمز کے خلاف کارروائی کرنے کیلئے عالمی اداروں سے رابطے کی بھی مجاز ہوگی۔
دسمبر 2023 میں نگران حکومت نے این سی سی آئی اے کے قیام کی منظوری دی تھی۔ اس کے بعد، ایف آئی اے کے سائبر کرائم ونگ ختم ہو جائیں گے اور متعلقہ افسران ایک سال تک این سی سی آئی اے میں خدمات سرانجام دیں گے۔
