راولپنڈی، سابق وزیرداخلہ شیخ رشید نے کہا کہ 190 ملین پاؤنڈ کیس کے فیصلے پر بانی پی ٹی آئی و سابق وزیراعظم عمران خان کو ذرا بھی پریشانی نہیں ہے۔
اڈیالہ جیل کے باہر میڈیا سے گفتگو کے دوران عوامی مسلم لیگ کے سربراہ شیخ رشید کا کہنا ہے کہ کمرہ عدالت میں عمران خان سے ملاقات ہوئی ہے، میں نے بانی پی ٹی آئی کو بوسہ دیا اور انہوں نے مجھے گلے لگایا۔
شیخ رشید کے مطابق سابق وزیراعظم عمران خان نے کہا آپ سیاست کو سمجھتے ہیں، اللہ بہت بڑا ہے، وہی ہماری مدد کرے گا جس پر میں نے کہا ہائیکورٹ سے آپ کو جلد ریلیف ملے گا اور ساتھ ہی ایک شعر یہ تو چلتی ہے تجھے اونچا اڑانے کے لیے بھی کہا۔
شیخ رشید کا کہنا تھا کہ 190 ملین پاؤنڈ کیس کے فیصلے پر عمران خان ذرا بھی پریشان نہیں، اگر جوڈیشل کمیشن نہیں بنا تو مذاکرات ختم ہیں، بیرسٹر گوہر اور آرمی چیف کی ملاقات کے بارے میں مجھے کوئی علم نہیں ہے۔
یاد رہے کہ احتساب عدالت نے 190 ملین پاؤنڈ کیس میں سابق وزیراعظم عمران خان کو 14 سال قید بامشقت اور ان کی اہلیہ بشریٰ بی بی کو 7 سال قید کی سزا سنائی جب کہ دونوں پر بالترتیب 10 لاکھ اور 5 لاکھ روپے کا جرمانہ بھی عائد کیا۔
دوسری جانب سینئرصوبائی وزیر مریم اورنگزیب نے کہا کہ 190ملین پاؤنڈ کیس کا فیصلہ عدالت نے کیا ہے ن لیگ نے نہیں، 190 ملین پاؤنڈ کیس کے فیصلے میں کوئی ابہام نہیں، بانی پی ٹی آئی مکافات عمل کا شکار ہیں، دوسروں کیلئے گڑھا کھودنے والاخود اس میں گر گیا۔
