دیپالپور کے تحصیل ہیڈ کوارٹر اسپتال میں ٹک ٹاکر اسٹاف نرس نے نوزائیدہ کے ہمراہ آنے والے تیماردار کو تھپڑ مار دیا۔
دیپالپور کے تحصیل ہیڈ کوارٹر اسپتال میں ایک ناخوشگوار واقعہ پیش آیا، جہاں ٹک ٹاکر اسٹاف نرس زنیرہ عباس نے مبینہ طور پر نوزائیدہ کے ساتھ آنے والے تیماردار محمد ندیم کو تھپڑ مار دیا۔ تفصیلات کے مطابق، محمد ندیم فرید کوٹ سے اپنی بیوی کے ہمراہ نوزائیدہ بچے کو لے کر ایمرجنسی بلاک آیا تھا۔
ندیم نے بچے کو انجکشن لگانے میں غفلت کا الزام لگایا، جس پر نرس نے غصے میں آ کر اس پر ہاتھ اٹھا دیا۔
واقعے کے بعد ہسپتال انتظامیہ نے فوری طور پر نرس کے خلاف محکمانہ کارروائی کی سفارش کر دی ہے۔ یہ بھی سامنے آیا ہے کہ زنیرہ عباس، جو ایک مشہور ٹک ٹاکر ہیں، اس سے قبل بھی شہرت حاصل کرنے کے لیے حاضر سروس سب انسپکٹر کو تھپڑ مار چکی ہیں۔
اس کے علاوہ، اسپتال میں دورانِ ڈیوٹی ٹک ٹاک ویڈیوز بنانے کی وجہ سے بھی وہ تنقید کی زد میں رہی ہیں۔
اس واقعے کے بعد سوشل میڈیا پر زنیرہ عباس کے خلاف سخت ردعمل دیکھنے کو مل رہا ہے، جبکہ ہسپتال انتظامیہ پر بھی ذمہ دارانہ کارروائی کے مطالبات کیے جا رہے ہیں۔
