اسلام آباد، وزیراعظم شہباز شریف کی جانب سے ملک کے مختلف حصوں میں ماہ رمضان کے دوران سحر و افطار میں گیس لوڈشیڈنگ کی شکایات کا نوٹس لے لیا گیا۔
وزیراعظم پاکستان نے سحر و افطار کے اوقات میں گیس لوڈشیڈنگ ہونے پر اظہار برہمی کرتے ہوئے پٹرولیم ڈویژن سے رپورٹ طلب کر لی۔
وزیراعظم شہباز شریف کا کہنا ہے کہ سحری اور افطاری کے وقت گیس بلا تعطل فراہم کی جائے۔
دوسری جانب ترجمان سوئی ناردرن گیس نے اپنے جاری بیان میں کہا ہے کہ وزیراعظم کی ہدایات پر فوری ایکشن لیتے ہوئے سحر و افطار کے اوقات میں گیس کی فراہمی ہر صورت یقینی بنائی جائے گی، شہری کسی بھی شکایت کی صورت میں 1199 پر رابطہ کریں۔
واضح رہے کہ گزشتہ روز وزیر اعظم پاکستان شہباز شریف نے چینی کی ذخیرہ اندوزی میں ملوث عناصر کے خلاف سخت کارروائی کا حکم دیا تھا۔
شہباز شریف نے کہا کہ گزشتہ مہینوں میں حکومت کی سخت کارروائیوں کے باعث چینی کی سمگلنگ کے خاتمے میں مدد ملی ہے، رمضان میں کسی بھی قسم کی ذخیرہ اندوزی یا مصنوعی مہنگائی کو برداشت نہیں کیا جائے گا، چینی کی قیمتوں پر قابو پانے کیلئے مزید سخت اقدامات اٹھائے جائیں۔
