پاک فوج کے شعبہ تعلقات عامہ آئی ایس پی آر کے مطابق سانحہ 9 مئی میں ملوث 25 مجرمان کو فوجی عدالتوں کی جانب سے سزائیں سنائی گئی ہیں۔
راولپنڈی: آئی ایس پی آر نے سانحہ 9 مئی میں ملوث مجرموں کو سزا سنانے کا اعلان کر دیا ہے۔ پاک فوج کے شعبہ تعلقات عامہ کے مطابق، 9 مئی کے واقعات میں ملوث 25 مجرمان کو فوجی عدالتوں کی جانب سے مختلف سزائیں دی گئی ہیں۔
تفصیلات کے مطابق جناح ہاؤس حملے میں ملوث جان محمد خان، محمد عمران محبوب، راجہ احسان، عبدالہادی، علی شان، اور داؤد خان کو 10،10 سال قید بامشقت کی سزا سنائی گئی ہے۔ مزید برآں، فہیم حیدر اور محمد حاشر کو 6،6 سال جبکہ محمد عاشق کو 4 سال قید بامشقت کی سزا دی گئی ہے۔
پنجاب رجمنٹل سینٹر مردان حملے میں ملوث رحمت اللہ کو 10 سال اور یاسر نواز کو 2 سال قید کی سزا ملی۔ پی اے ایف بیس میانوالی حملے میں انور خان اور بابر جمال کو 10،10 سال قید بامشقت دی گئی، جبکہ بنوں کینٹ حملے میں محمد آفاق خان کو 9 سال اور چکدرہ قلعہ حملے میں داؤد خان کو 7 سال قید بامشقت کی سزا دی گئی ہے۔
اسی طرح ملتان کینٹ چیک پوسٹ حملے میں زاہد خان کو 4 سال اور خرم شہزاد کو 3 سال قید کی سزا سنائی گئی۔ جی ایچ کیو حملے میں ملوث عمر فاروق کو بھی 10 سال قید بامشقت کی سزا دی گئی ہے۔
آئی ایس پی آر نے سانحہ 9 مئی کے واقعات کو پاکستان کی تاریخ کا ایک سیاہ باب قرار دیا اور کہا کہ ان پرتشدد واقعات میں عوام نے سیاسی طور پر بھڑکائے گئے اشتعال انگیز تشدد اور جلاؤ گھیراؤ کا مشاہدہ کیا۔
