امام اور خطیب مسجد الحرام شیخ ڈاکٹر یاسر بن راشد الدوسری نے رمضان المبارک کے آخری جمعے کے خطبے میں تقویٰ اختیار کرنے اور تزکیہ نفس پر زور دیا۔
مسجد الحرام کے امام اور خطیب شیخ ڈاکٹر یاسر بن راشد الدوسری نے رمضان المبارک کے آخری جمعے کے خطبے میں تقویٰ اختیار کرنے اور تزکیہ نفس پر زور دیا۔ انہوں نے کہا کہ رمضان اللہ کی رحمتیں اور مغفرت حاصل کرنے کا نادر موقع ہے، جس سے ہر مسلمان کو بھرپور فائدہ اٹھانا چاہیے۔
عرب میڈیا کے مطابق امام کعبہ نے روزے کی اہمیت بیان کرتے ہوئے کہا کہ یہ عبادت نفس کی پاکیزگی، اللہ کی قربت اور مغفرت حاصل کرنے کا بہترین ذریعہ ہے۔ انہوں نے مزید کہا کہ ہر مسلمان کو چاہیے کہ وہ اس بابرکت مہینے میں عبادات، دعا اور خیرات کے ذریعے اللہ کی رضا حاصل کرے۔
مستحقین میں خوراک کی تقسیم، اللہ کی خوشنودی کا ذریعہ
شیخ ڈاکٹر یاسر بن راشد الدوسری نے خیرات اور صدقات کی اہمیت پر بھی روشنی ڈالی۔ انہوں نے کہا کہ مستحقین میں خوراک کی تقسیم اللہ کی خوشنودی اور قربت کا ذریعہ بنتی ہے۔ رمضان میں صدقہ و خیرات اور مستحقین کی مدد کرنا ایمان کو مضبوط کرتا ہے اور اخروی کامیابی کا سبب بنتا ہے۔
آخری ایام میں عبادات کی فضیلت
امام حرم نے رمضان کے آخری ایام میں زیادہ سے زیادہ عبادات میں مشغول ہونے پر زور دیا۔ انہوں نے کہا کہ یہ دن اور راتیں قبولیت کی گھڑیاں ہیں، جن میں کی جانے والی دعائیں زیادہ اثر رکھتی ہیں۔
آخر میں امام کعبہ نے کہا کہ رمضان میں کی جانے والی عبادات، خیرات اور روزے ایمان کو تازگی بخشتے ہیں اور یہ مہینہ تزکیہ نفس، صبر اور قربِ الٰہی کا بہترین موقع فراہم کرتا ہے۔
