لاہور، صوبائی دارالحکومت لاہور میں دھواں چھوڑنے والی گاڑیوں پر 24 گھنٹوں میں 63 لاکھ کے جرمانےعائد کردیے گئے۔
سی ٹی او لاہور عمارہ اطہر کا کہنا ہے کہ وارننگ اور آگاہی مہمات کے بعد اب بس کریک ڈاؤن جاری ہے، ٹریفک پولیس کی جانب سے 24 گھنٹوں میں دھواں چھوڑنے والی 3176 گاڑیوں کو 63 لاکھ کے جرمانے کیے گئے ہیں۔
خطرناک حد تک دھواں چھوڑنے پر 1579 موٹر سائیکلوں کو 32 لاکھ کے جرمانے کیے گئے، 264 موٹرسائیکلیں اور 153 ٹریکٹرٹرالیاں مختلف ٹریفک سیکٹرز میں بند کردی گئیں۔
آرٹیفشل انٹیلیجنس سسٹم کی معاونت سےبھی دھواں چھوڑنے والی 240 وہیکلز کو ای چالان جاری ہوئے، شہر میں 41 اینٹی سموگ سکواڈز تشکیل دیئے گئے ہیں جبکہ داخلی و خارجی راستوں پر 12 ناکے بھی قائم ہیں۔
کمشنر لاہور کی ہدایات پر قائم 14 انسداد تجاوزات کیمپس بھی مزید متحرک ہیں، آج لاہور میں ہیوی ٹریفک کا داخلہ مکمل طور پر بند ہو گا۔
سی ٹی او لاہور عمارہ اطہرکے مطابق پابندی سے مستثنٰی گاڑیوں کو داخلے کی اجازت ہوگی، اسموگ اور ماحولیاتی آلودگی کے خاتمے کیلئے ہم سب کو مل کر کوششیں کرنا ہونگیں۔
