کراچی، دریائے سندھ سے چھ نہریں نکالنے کے منصوبے کے خلاف پیپلز پارٹی کے کارکنوں نے سندھ کے مختلف شہروں میں احتجاج کیا۔
نجی ٹی وی چینل کے مطابق پیپلز پارٹی کے کارکنوں نے لاڑکانہ، بدین، نواب شاہ، گھوٹکی، جیکب آباد، کندھ کوٹ، نوشہروفیروز، تھرپارکر، جامشورو سمیت دیگر شہروں میں احتجاجی مظاہرے کیے، جن میں ضلعی قیادت اور ارکانِ اسمبلی نے بھی شرکت کی۔
دوسری طرف قوم پرست تنظیموں کی جانب سے بھی اس منصوبے کے خلاف احتجاج جاری ہے۔ عوامی تحریک نے نوشہرو فیروز میں مظاہرہ کیا، جہاں مظاہرین نے اس منصوبے کو سندھ کو بنجر بنانے کی سازش قرار دیا۔
دوسری جانب وفاقی وزارت داخلہ نے خیبرپختونخوا حکومت سے صوبے میں زیر تعلیم افغان طلبہ کا مکمل ریکارڈ فراہم کرنے کی ہدایت کی ہے۔
وزارت داخلہ کے فارن نیشنل سکیورٹی سیل نے اس حوالے سے سیکرٹری داخلہ خیبرپختونخوا کو باضابطہ خط ارسال کیا، جس میں کہا گیا ہے کہ غیرملکیوں سے متعلق ڈیٹا بیس کو اپ ڈیٹ کیا جا رہا ہے، لہٰذا خیبرپختونخوا میں زیر تعلیم تمام افغان طلبہ کا ڈیٹا 27 مارچ تک فراہم کیا جائے۔
