پنجاب حکومت کی جانب سے مصنوعی بارش کا تجربہ راولپنڈی میں کرنے کا فیصلہ کر لیاگیا۔
ذرائع محکمہ ماحولیات کا کہنا ہے کہ راولپنڈی میں بادلوں کی ممکنہ موجودگی میں مصنوعی بارش کا فیصلہ کیا جائے گا۔
محکمہ ماحولیات پنجاب سمیت متعلقہ ادارے راولپنڈی میں پہنچ گئے ہیں، مقامی طور پر مصنوعی بارش کا پاکستان میں پہلا تجربہ کیا جائے گا۔
ذرائع کا کہنا ہے کہ راولپنڈی میں مصنوعی بارش کے بعد صوبائی دارالحکومت لاہور میں مصنوعی بارش کا تجربہ کیا جائے گا۔
واضح رہے کہ لاہور سمیت متعدد شہروں میں اسموگ کے باعث صورت حال بہت خراب ہے اور لاہور دنیا میں آلودہ ترین شہروں میں سرفہرست ہے۔
گزشتہ روز ملتان میں بھی اسموگ سے آلودگی کا انڈیکس خطرناک حد تک بڑھ گیا اور صوبائی حکومت نے حدنگاہ کے مسئلے کے پیش نظر موٹروے بند کرنے کا فیصلہ کیا تھا۔
دوسری جانب لاہور ہائیکورٹ نے شہریوں کے لیے مشکلات کی وجہ بننے والی اسموگ کو کنٹرول کرنے والے حکومتی محکموں کو ناکام قرار دے دیا۔
اسموگ کو کنٹرول کرنے کے لیے دائر درخواستوں پر سماعت کے دوران جسٹس شاہد کریم کی جانب سے ریمارکس دیے گئے کہ ہر جگہ پر فصلوں کی باقیات کو جلایا جا رہا ہے، ہر جگہ کنسٹرکشن کا کام چل رہا ہے، آپ بسوں کے پیچھے جا رہے ہیں، موٹر سائیکلیں سب سے زیادہ آلودگی پھیلا رہی ہیں۔
