پشاور، اپوزیشن لیڈر قومی اسمبلی اور رہنما پی ٹی آئی عمر ایوب کا کہنا ہے کہ حکومت میں آکر 26 ویں آئینی ترمیم کو ختم کریں گے۔
پشاور ہائیکورٹ کے باہر میڈیا سے گفتگو کے دوران رہنما پی ٹی آئی عمر ایوب کا کہنا تھا کہ تحریک انصاف ورکرز اور رہنماؤں پر بے شمار جعلی کیسز درج کئے گئے ہیں، حکومت کے ساتھ کوئی رابطہ نہیں ہے، تمام سیاسی قیدیوں کی رہائی کی کوشش کر رہے ہیں۔
عمر ایوب کا کہنا ہے کہ عالمی مالیاتی فنڈ (آئی ایم ایف) کے وفد نے بھی عدلیہ سے بات کی ہے، رولز آف لاء پاکستان میں نہیں ہے، لوگ زمین فروخت کر کے ملک چھوڑ رہے ہیں، نوجوان لاکھوں روپے دے کر بیرون ملک جا رہے ہیں، پاکستان میں قوت خرید کم ہو رہی ہے۔
رہنما پی ٹی آئی نے کہا کہ کل اسمبلی میں ووٹ کاسٹ کے عمل کو روکا گیا، پاکستان میں تمام اپوزیشن جماعتیں متحد ہوگئی ہیں، رمضان کے بعد ایک بھرپور مہم چلائیں گے، 26 ویں آئینی ترمیم کو جب حکومت آئے گی تو ختم کریں گے۔
دوسری جانب انسداد دہشت گردی عدالت لاہور نے عمر ایوب کی 9 مئی کے مقدمات میں عبوری ضمانتوں میں 14 مارچ تک توسیع کر دی ہے۔
اے ٹی سی عدالت کے جج کی جانب سے عبوری ضمانتوں پر سماعت کی گئی، عمر ایوب کے وکیل رانا مدثر ایڈووکیٹ نے حاضری معافی کی درخواست دائر کی، جس کے مطابق عمر ایوب پشاور ہائیکورٹ میں کیس کی سماعت میں مصروف ہیں، عدالت ایک دن کی حاضری معافی کی درخواست منظور کرے۔
