132
سعودی حکومت کی جانب سے یہ اعلان ایسے وقت میں آیا ہے جب حج 2025 کی تیاریوں کا آغاز ہو چکا ہے۔
جدہ: سعودی حکومت نے حج 2025 کے لیے میننجائٹس ویکسین کو لازمی قرار دے دیا ہے۔ وزارت حج و عمرہ کے مطابق، تمام ملکی اور غیرملکی عازمین کو ویکسین لگوانی ہوگی، بصورت دیگر انہیں حج کی اجازت نہیں دی جائے گی۔
حکام کا کہنا ہے کہ بغیر ویکسین کے کسی بھی شخص کو حج پیکج بک کرانے یا رجسٹریشن کی اجازت نہیں دی جائے گی۔ اس فیصلے کا مقصد حج کے دوران متعدی بیماریوں کے پھیلاؤ کو روکنا ہے، کیونکہ میننجائٹس ایک خطرناک بیماری ہے جو رش والی جگہوں پر تیزی سے پھیل سکتی ہے۔
یہ اعلان ایسے وقت میں آیا ہے جب حج 2025 کی تیاریاں شروع ہو چکی ہیں اور مختلف ممالک، بشمول پاکستان، کے ساتھ حج معاہدے طے پا رہے ہیں۔ عازمین کو ہدایت دی گئی ہے کہ وہ وقت سے پہلے ویکسینیشن مکمل کروا لیں تاکہ ان کی رجسٹریشن میں کسی قسم کی رکاوٹ نہ آئے۔
