راولپنڈی، رہنما پی ٹی آئی بیرسٹر سلمان اکرم راجہ کا کہنا ہے کہ جیل حکام نے ہمارے ساتھ گیم کی ہے، ہمیں اندر بلا کر کہا گیا وقت ختم ہوگیا ہے، ہم ایک بجے کے یہاں آئے ہوئے ہیں لیکن ملاقات نہیں کرنے دی گئی۔
اڈیالہ جیل کے باہر میڈیا سے گفتگو کے دوران چیئرمین بیرسٹر سلمان اکرم راجہ کا کہنا ہے کہ اچھی بات یہ ہے کہ بہنوں کی ملاقات ہوئی ہے، فیملی کے 5 ممبران ملے ہیں، علیمہ خان نے بتایا بانی کی صحت بالکل ٹھیک ہے۔
سلمان اکرم راجہ کا کہنا ہے کہ راستے روکنا بچگانہ قسم کی حرکت ہے، یہ سمجھتے ہیں اس طرح بانی پر دباؤ ڈالا جاسکتا ہے، ان کو لگتا ہے راستے بند کرنے اور ملاقات نہ کرانے سے بانی دباؤ میں آجائیں گے۔
رہنما پی ٹی آئی کا کہنا ہے کہ یہ عمران خان کو نہیں سمجھ سکے، وہ کسی دباؤ میں نہیں آئیں گے، عمران خان مضبوط اعصاب کے مالک ہیں وہ کسی قسم کی ڈیل نہیں کریں گے، بانی پی ٹی آئی اپنے اصولوں کے ساتھ کھڑے ہیں۔
سلمان اکرم کا کہنا ہے کہ عمران خان آئین و قانون کے مطابق جیل سے باہر آئیں گے، ان کو کوئی آسانی نہیں چاہئے، بانی کی بہنوں نے جو آج بیان دیا ہے اس سے واضح ہے وہ کسی قسم کی ڈیل نہیں چاہتے۔
رہنما پی ٹی آئی کا کہنا ہے کہ عمران خان اصول کی بات کرتے ہیں وہ کہتے ہیں فوج ہماری فوج ہے، سابق وزیراعظم کا کہنا ہے دہشت گردی کے خلاف سب کو مل کر چلنا چاہئے، بانی کے ساتھ جو ذاتی طور پر ہو رہا ہے اس پر وہ جس بھی شخصیت کو ذمہ دار ٹھہرائیں گے وہ حق بجانب ہے۔
