لاہور جیلوں میں قیدیوں سے ملاقات کے لیے پیشگی بکنگ سسٹم متعارف کرانے کا فیصلہ کیا گیا ہے، جس سے ملاقات کے لیے طویل انتظار کی زحمت نہیں اٹھانی پڑے گی۔
آئی جی جیل خانہ جات میاں فاروق نذیر نے بتایا کہ ملاقاتی آن لائن سسٹم کے ذریعے وقت حاصل کریں گے، اور مقررہ وقت پر قیدی کو بلا کر ملاقات کروائی جائے گی۔
انہوں نے مزید وضاحت کی کہ شہری ویب سائٹ یا واٹس ایپ نمبر پر اپنے کوائف بھیج کر ملاقات کے لیے وقت طے کر سکیں گے۔ اس نظام کو پہلے مرحلے میں گزشتہ سال کیمپ جیل میں آزمائشی طور پر متعارف کرایا گیا تھا۔
آئی جی جیل کے مطابق اس پائلٹ پراجیکٹ کی کامیابی کے بعد، اپریل سے لاہور کی سینٹرل جیل سمیت پنجاب کی تمام جیلوں میں اس کا باضابطہ آغاز کر دیا جائے گا۔
جیل حکام کا کہنا ہے کہ کیمپ جیل میں ایڈوانس بکنگ کے فروغ کے لیے شہریوں کو اس سسٹم کے فوائد سے آگاہ کرنے کی ہدایات دی گئی تھیں، جس کے نتیجے میں اب روزانہ سیکڑوں افراد اس سہولت سے استفادہ کر رہے ہیں۔
میاں فاروق نذیر نے مزید کہا کہ ایڈوانس بکنگ سسٹم کے باعث جیلوں کی انتظار گاہوں میں رش کم ہوگا، جبکہ پنجاب بھر کی جیلوں میں ویڈیو کال سروس کے آغاز سے بھی ملاقاتوں کی تعداد میں واضح کمی دیکھی جا رہی ہے۔
