کیپ ٹاؤن، پاکستان لانگ رینج رائفل ٹیم نے جنوبی افریقہ میں ہونے والی ایف کلاس نیشنل لانگ رینج چیمپئن شپ 2025 میں غیر معمولی کارکردگی دکھاتے ہوئے نئی تاریخ رقم کر دی۔
پاکستانی ٹیم نے دونوں ٹیم ایونٹس میں شاندار کامیابی حاصل کرتے ہوئے ڈبل گولڈ میڈل اپنے نام کیا اور میزبان اور عالمی نمبر ون ٹیم جنوبی افریقہ کو ان کے ہی میدان میں شکست دے دی۔
مارچ 2025 میں پاکستانی ٹیم نے جنوبی افریقہ میں چار روزہ ونڈ ٹریننگ کیمپ میں شرکت کی جو 27 سے 30 مارچ تک جاری رہا، یہ تربیتی کیمپ جنوبی افریقہ کے معروف کوچز ہینی گربر اور جولیئس ہارٹمین کی نگرانی میں منعقد ہوا۔
یہ چیمپئن شپ آئندہ یورپین ایف کلاس ٹیمز چیمپئن شپ ستمبر 2025 برطانیہ اور ورلڈ چیمپئن شپ 2026 کے لیے تیاری کا حصہ تھی۔
وائس پریذیڈنٹ ٹیم میچ میں پاکستان نے 1200 میں سے 1168 پوائنٹس حاصل کر کے گولڈ میڈل جیتا، جب کہ سب سے معتبر مقابلے چیئرمینز ٹیم کپ میں پاکستان نے 1200 میں سے 1174 پوائنٹس کے ساتھ دوبارہ سونے کا تمغہ اپنے نام کیا۔
ٹیم میں شامل نمایاں ناموں میں لیفٹیننٹ جنرل احسن، اسد وحید، عبید ابراہیم، حذیفہ گل، جنید وقاص، لیفٹیننٹ کرنل جنید علی اور سپاہی ولید شامل تھے، جبکہ کوچنگ کے فرائض ہینی گربر اور جولیئس ہارٹمین نے انجام دیے۔
انفرادی کیٹیگری میں بھی پاکستان نے بہترین کارکردگی کا مظاہرہ کرتے ہوئے مجموعی طور پر 11 تمغے جیتے جن میں 5 گولڈ، 3 سلور اور 3 برونز شامل ہیں، لیفٹیننٹ کرنل جنید علی نے اپنی شاندار مہارت کے ذریعے 3 گولڈ، 2 سلور اور 2 برونز میڈلز حاصل کیے۔
دیگر نمایاں کامیابیوں میں شامل ہیں:
- – اسکاٹش سوورڈ میچ: سپاہی ولید (گولڈ)
- – اسٹیٹ پریذیڈنٹ فرسٹ اسٹیج: عبید ابراہیم (سلور)، لیفٹیننٹ کرنل جنید علی (برونز)
- – جیک مچلی میچ: اسد وحید (گولڈ)
- – فری اسٹیٹ بزلے میچ: لیفٹیننٹ کرنل جنید علی (گولڈ)
- – ڈالرمپل کپ: لیفٹیننٹ کرنل جنید علی (سلور)
- – کرنل بوڈلے میچ: لیفٹیننٹ کرنل جنید علی (گولڈ)
- – اسٹیٹ پریذیڈنٹ سیکنڈ اسٹیج: لیفٹیننٹ کرنل جنید علی (سلور)
- – اسٹیٹ پریذیڈنٹ اوورآل ٹرافی: لیفٹیننٹ کرنل جنید علی (گولڈ)، عبید ابراہیم (برونز)
- – جنوبی افریقہ چیمپئن شپ ایگریگیٹ اوورآل: لیفٹیننٹ کرنل جنید علی (برونز)
یہ شاندار کامیابی پاکستانی شوٹنگ ٹیم کے لیے ایک تاریخی لمحہ ہے اور عالمی سطح پر پاکستان کی بڑھتی ہوئی شناخت کا ثبوت ہے۔
