کراچی، فیڈرل انویسٹی گیشن ایجنسی (ایف آئی اے) کی جانب سے کراچی ائیرپورٹ پر کارروائی کرتے ہوئے جعلی سفری دستاویزات پر سفر کرنے والے مسافر کو گرفتار کرلیا گیا۔
ترجمان ایف آئی اے کے مطابق امیگریشن حکام کی جانب سے کراچی ائیرپورٹ پر کارروائی کرکے جعلی سفری دستاویزات پر بیرون ملک جانے کی کوشش ناکام بنا کر ملزم محمد عثمان کو گرفتار کرلیا گیا۔
ملزم کی جانب سے بین الاقوامی پرواز کے ذریعے کینیڈا جانے کی کوشش کی گئی، ملزم کے پاسپورٹ پر کینیڈا کا جعلی ویزا لگا ہوا تھا۔
سکینڈ لائن آفس کی فارنزک رپورٹ کے مطابق بھی ویزا جعلی تھا، ویزے میں کسی قسم کی یو وی خصوصیات نہیں تھیں۔
ابتدائی تفتیش میں پتہ لگا ہے کہ ملزم نے شیخوپورہ کے ایجنٹ سے کینیڈا جانے کا معاہدہ کیا، ملزم نے نواز نامی ایجنٹ سے ایک کروڑ 5 لاکھ روپے میں کینیڈا جانے کا معاہدہ کیا۔
ملزم پنجاب پولیس کا ملازم اور وومن انکلیو گجرانوالہ میں بطور کانسٹیبل تعینات ہے، ملزم کو ایجنٹ کی نشاندہی اور مزید قانونی کارروائی کے لیے اینٹی ہیومن ٹریفکنگ سرکل کراچی منتقل کر دیا گیا ہے۔
