پشاور، مشیر اطلاعات خیبرپختونخوا بیرسٹر ڈاکٹر سیف کا کہنا ہے کہ جعلی حکومت گرفتار کارکنوں کی اہلخانہ سے جلد ملاقات کا بندوبست کرے۔
اپنے بیان میں بیرسٹر سیف نے کہا کہ اطلاعات ہیں کہ جعلی حکومت گرفتار کارکنوں سے اہلخانہ کی ملاقات نہیں کرا رہی، ملاقاتیں نہ ہونے سے گھر والوں میں شدید اضطراب پایا جاتا ہے، جعلی حکومت جلد ملاقات کا بندوبست کرے تاکہ اہلخانہ کو تسلی ہو کہ ان کے پیارے زندہ ہیں۔
بیرسٹر سیف کا کہنا تھا کہ ملاقات کیلئے بے چارے در در کی ٹھوکریں کھا رہے ہیں، کبھی ایک تھانے اور کبھی دوسرے تھانے کے چکر لگاتے ہیں، گھر والوں کو بتایا جائے کہ ان کے پیارے تھانے میں ہیں یا ہسپتالوں میں؟
صوبائی مشیر اطلاعات کا کہنا تھا کہ جعلی حکومت بتائے ملاقاتیں کیوں نہیں کرا رہی، وزیراعلیٰ کے پی کی جانب سے ہدایت کی گئی ہے کہ گرفتار کارکنوں کی اہلخانہ سے ملاقات کیلئے قانونی معاونت فراہم کریں گے۔
بیرسٹر سیف کا کہنا تھا کہ جعلی اور ظالم حکومت نہتے کارکنوں کو کس جرم کی سزا دے رہی ہے، احتجاج تو ہر شہری کا جمہوری اور آئینی حق ہے، جعلی حکومت کی فسطائیت آسمان کو چھو رہی ہے۔
