اسلام آباد، وفاقی وزیر داخلہ محسن نقوی کا کہنا ہے کہ جشن بہار اں میلے کے انعقاد کا مقصد پاکستان کی ثقافت اور کلچر کو اجاگر کرنا ہے۔
اسلام آباد کے شہری 25، 26 اور 27 فروری کو جشن بہاراں سے محظوظ ہوسکیں گے، جشن بہاراں میں پاکستان بھر کے روایتی اور مشہور کھانوں کے سٹالز لگائے جائیں گے، جشن بہاراں میں رینجرز کا دستہ مشعل پریڈ اور اسلام آباد پولیس کا دستہ شمع پریڈ کا مظاہرہ کرے گا۔
میلے میں پاک فوج کے بینڈز بھی پرفارم کریں گے، جشن بہاراں کے دوران آتش بازی کا زبردست مظاہرہ ہو گا جبکہ خٹک، کیلاش اور کتھک سمیت روایتی رقص کے شوز بھی پیش کئے جائیں گے ، رینجرز کی کیمل پلٹون اور نیزہ بازی کی ٹیمیں بھی مظاہرہ کریں گی ۔
وزیرداخلہ محسن نقوی کی جانب سے پولیس لائنز اسلام آباد کا دورہ کیاگیا، جشن بہاراں کے لیے شمع پریڈ کی ریہرسل کا معائنہ کیا۔
اسکے بعد وزیر داخلہ محسن نقوی کی زیر صدارت اجلاس بھی ہوا جس میں وفاقی سیکرٹری داخلہ، چیف کمشنر اسلام آباد، آئی جی اسلام آبادپولیس، ڈپٹی کمشنر اسلام آباد اور متعلقہ حکام شریک ہوئے، اجلاس میں جشن بہاراں میلے کی تیاریوں اور انتظامات کا جائزہ لیا گیا۔
اجلاس میں گفتگو کے دوران وزیر داخلہ محسن نقوی نے کہا کہ جشن بہاراں میں عوام کی تفریح کیلئے پہلی بار روایت سے ہٹ کر منفرد پروگرامز پیش کئے جائیں گے، جشن بہاراں کا مقصد پاکستان کی ثقافت اور کلچر کو اجاگر کرنا ہے۔
محسن نقوی کا کہنا ہے کہ جشن بہاراں میں سفارتی برداری کو بھی مدعو کیا جائے گا تاکہ وہ ہماری ثقافت سے روشناس ہو سکیں، پاکستان میں غیر ملکی کمپنیوں کے سی ای آوز کو بھی شرکت کی دعوت دی جائے گی۔
