لاہور، چیئرمین پاکستان علما کونسل حافظ طاہر اشرفی کا کہنا ہے کہ آج جامعہ حقانیہ میں دھماکے کی مذمت کرتا ہوں، اس گھناؤنے فعل میں ملوث مسلمان نہیں ہوسکتے۔
لاہور سے جاری اپنے ایک بیان میں چیئرمین پاکستان علما کونسل طاہر اشرفی نے کہا کہ پاکستان کے حالات جب بھی بہتری کی طرف چلتے ہیں دشمن سازشوں کے ذریعے حالات خراب کرنے کی کوشش کرتے ہیں، پاکستان ہم سب کا ملک ہے اس کا استحکام ہم سب کو بہت عزیز ہے۔
طاہر اشرفی کا کہنا ہے کہ جمعہ کی نماز میں میرا بھائیوں جیسا دوست خالق حقیقی سے جا ملا، مسجدوں، چرچز اور دیگر عبادت گاہوں پر حملہ کرنے والے مسلمان نہیں ہو سکتے، ہم قرآن، حج، حرمین شریفین اور الاقصیٰ کی بات کرتے رہیں گے۔
چیئرمین پاکستان علما کونسل نے کہا کہ پاکستان کے خلاف دشمنوں کی سازشیں ملکر ناکام بنائیں گے، دین کی سربلندی اور ملکی استحکام ہماری اولین ترجیح ہے۔
طاہر اشرفی نے کہا کہ دہشت گردی کے خلاف جنگ میں قوم متحد ہے، حج کے دوران سعودی قوانین پر عمل درآمد یقینی بنانا ہوگا۔
یاد رہے کہ نوشہرہ میں دارالعلوم حقانیہ اکوڑہ خٹک کی جامع مسجد میں نماز جمعہ کے بعد خارجی راستے میں ہونے والے خود کش دھماکے میں مولانا حامد الحق حقانی سمیت 6 افراد شہید ہوگئے۔
