ترک صدر رجب طیب اردگان آج 2 روزہ دورے پر پاکستان پہنچیں گے۔
ترک صدر رجب طیب اردوان آج (بدھ) دو روزہ دورے پر اسلام آباد پہنچ رہے ہیں۔ یہ ان کا پانچ سال بعد پاکستان کا پہلا دورہ ہوگا، جس کے دوران وہ وزیراعظم شہباز شریف سمیت اعلیٰ سیاسی قیادت سے ملاقات کریں گے۔
وزیراعظم شہباز شریف اور ترک صدر ساتویں پاک-ترک ہائی لیول اسٹریٹیجک کونسل اجلاس کی مشترکہ صدارت کریں گے۔ دفتر خارجہ کے مطابق، یہ دورہ ملائیشیا اور انڈونیشیا کے دوروں کے بعد ہو رہا ہے، اور ترک صدر کے ہمراہ اعلیٰ سطحی وفد بھی موجود ہوگا، جس میں ترک وزرا، سینیئر حکام اور سرمایہ کار شامل ہیں۔
اجلاس کے اختتام پر اہم معاہدوں اور ایم او یوز پر دستخط کیے جائیں گے، جبکہ وزیراعظم شہباز شریف اور ترک صدر مشترکہ پریس کانفرنس سے خطاب کریں گے۔ اس سے قبل ہائی لیول اسٹریٹیجک کونسل کا چھٹا اجلاس فروری 2020 میں منعقد ہوا تھا۔
دورے کے دوران، ترک صدر ترکیہ-پاکستان بزنس انویسٹمنٹ فورم میں بھی شرکت کریں گے، جبکہ ان کی پاکستانی قیادت سے ملاقاتوں میں غزہ اور مشرق وسطیٰ کی صورتحال سمیت اہم علاقائی و عالمی امور پر تبادلہ خیال ہوگا۔
گزشتہ چند برسوں میں پاکستان اور ترکیہ کے درمیان اسٹریٹیجک شراکت داری میں نمایاں پیش رفت ہوئی ہے، خاص طور پر دفاعی شعبے میں دونوں ممالک کے تعلقات مضبوط ہوئے ہیں۔ پاکستان ترکی سے ملجم پروجیکٹ کے تحت جنگی بحری جہاز خریدنے والا پہلا ملک ہے اور پہلے ہی ترکیہ سے آقنچی، بیرکتار اور ٹی بی ٹو ڈرونز حاصل کر چکا ہے۔
ففتھ جنریشن فائٹر جیٹ کے مشترکہ منصوبے پر بھی کام تیزی سے جاری ہے، اور دونوں ممالک ٹی ایف-ایکس فائٹر جیٹ کی پاکستان میں اسمبلی لائن کے قیام پر متفق ہو چکے ہیں۔
ترک صدر کی آمد پر پاکستان ایئر فورس کے جے ایف-17 تھنڈر طیارے ان کے صدارتی طیارے کو پاکستان کی فضائی حدود میں داخل ہوتے ہی پروٹوکول کے طور پر گھیرے میں لے لیں گے، جبکہ شاہراہ دستور کو ترکیہ کے پرچموں سے سجا دیا گیا ہے۔
