پشاور، خیبرپختونخوا کے مشیر اطلاعات بیرسٹر ڈاکٹر سیف نے وفاقی وزیر پٹرولیم کی جانب سے وزیراعلیٰ خیبرپختونخوا پر لگائے گئے الزامات کو مسترد کرتے ہوئے قانونی کارروائی کا عندیہ دے دیا۔
اپنے بیان میں بیرسٹر سیف نے کہا کہ علی پرویز ملک نے وزیراعلیٰ پر بے بنیاد اور جھوٹے الزامات عائد کیے ہیں، وزیراعلیٰ نے مائنز اینڈ منرلز بل سے متعلق کسی بھی دستاویز پر دستخط نہیں کیے، اور نہ ہی اس حوالے سے وفاقی حکومت کے ساتھ کوئی معاہدہ طے پایا ہے۔
انہوں نے کہا کہ وفاقی وزیر کو اپنے الزامات کے ثبوت پیش کرنا ہوں گے، بصورت دیگر ان کے خلاف قانونی چارہ جوئی کی جائے گی، وزیراعلیٰ خیبرپختونخوا پر جھوٹے الزامات ناقابل برداشت ہیں۔
بیرسٹر سیف نے واضح کیا کہ مائنز اینڈ منرلز بل صوبے کی بہتری، عوامی مفادات اور قدرتی وسائل کے تحفظ کو مدنظر رکھتے ہوئے تیار کیا گیا ہے، اس عمل میں کسی قسم کی بیرونی مداخلت یا دباؤ کو خاطر میں نہیں لایا گیا۔
مزید کہا کہ اگر دیگر صوبوں نے وفاقی حکومت کی ہدایات پر قانون سازی کی ہے تو یہ ان کا اپنا آئینی اختیار ہے، مگر خیبرپختونخوا نے صرف اور صرف اپنے عوام کی فلاح کے پیشِ نظر فیصلے کیے ہیں۔
