آئی ایس پی آر کے مطابق سیکیورٹی فورسز نے بنوں کنٹونمنٹ پر دہشت گرد حملے کی کوشش کو ناکام بناتے ہوئے 16 دہشت گردوں کو ہلاک کر دیا۔
پاک فوج کے شعبہ تعلقات عامہ (آئی ایس پی آر) کے مطابق بنوں کنٹونمنٹ پر دہشتگرد حملے کی کوشش کو ناکام بنا دیا گیا، جس میں تمام 16 حملہ آور مارے گئے، جن میں 4 خودکش بمبار بھی شامل تھے۔ تاہم، اس جھڑپ میں پاک فوج کے 5 جوان شہید ہو گئے۔
آئی ایس پی آر کے بیان میں کہا گیا ہے کہ خوارج عناصر نے کنٹونمنٹ کی سکیورٹی توڑنے کی کوشش کی، مگر سکیورٹی فورسز نے فوری اور مؤثر کارروائی کرتے ہوئے ان کے مذموم عزائم خاک میں ملا دیے۔ حملے کے دوران خودکش دھماکوں سے چھاؤنی کی دیوار کا ایک حصہ گر گیا، جبکہ ایک مسجد اور رہائشی عمارت بھی متاثر ہوئیں، جس کے نتیجے میں 13 شہری شہید اور 32 زخمی ہو گئے۔
پاک فوج کے مطابق خفیہ اطلاعات اور شواہد سے ثابت ہوا ہے کہ اس حملے میں افغان شہری ملوث تھے اور اس کی منصوبہ بندی افغانستان میں موجود خوارج کے سرغنوں نے کی۔ آئی ایس پی آر نے افغان عبوری حکومت سے مطالبہ کیا کہ وہ اپنی ذمہ داریاں نبھائے اور اپنی سرزمین کو پاکستان کے خلاف استعمال ہونے سے روکے۔
بیان میں مزید کہا گیا کہ پاکستان کی سکیورٹی فورسز دہشتگردی کے مکمل خاتمے کے لیے پرعزم ہیں اور بہادر جوانوں کی قربانیاں اس عزم کو مزید تقویت دیتی ہیں۔ پاکستان اپنی سرزمین کے تحفظ کے لیے ہر ممکن اقدامات کرنے کا حق محفوظ رکھتا ہے۔
