41
کوئٹہ، ڈویژنل سپرنٹنڈنٹ ریلویز کوئٹہ عمران حیات کا کہنا ہے کہ بلوچستان سے ملک کے دیگر حصوں تک ریل سروس کی بحالی کے لیے تمام انتظامات مکمل کر لیے گئے ہیں، اب صرف سیکیورٹی کلیئرنس کا انتظار باقی ہے۔
نجی ٹی وی چینل سے گفتگو میں ڈی ایس ریلویز عمران حیات نے بتایا کہ 26 مارچ کو وفاقی وزیر ریلویز کوئٹہ کا دورہ کریں گے، جہاں وہ ایک اہم اجلاس کی صدارت کریں گے۔ اجلاس میں تمام پہلوؤں کا جائزہ لیا جائے گا اور ریل سروس کی بحالی کا حتمی فیصلہ کیا جائے گا۔
انہوں نے کہا کہ ٹرین سروس کی بحالی کے لیے ہر ممکن تیاری کر لی گئی ہے، جیسے ہی سیکیورٹی کلیئرنس ملے گی، سروس بحال کر دی جائے گی۔
جعفر ایکسپریس حملے پر بات کرتے ہوئے عمران حیات نے بتایا کہ واقعے سے ریلوے کو ہونے والے نقصانات کا تخمینہ لگایا جا رہا ہے۔
دوسری جانب ریلوے حکام کے مطابق اندرون ملک ٹرین سروس گزشتہ 13 روز سے معطل ہے۔ کوئٹہ سے پشاور کے لیے جعفر ایکسپریس اور کراچی کے لیے بولان میل تاحال بند ہیں۔
واضح رہے کہ 11 مارچ کو کچھی میں جعفر ایکسپریس پر حملے کے بعد ٹرین سروس معطل کر دی گئی تھی۔
