44
بلغاریہ میں ٹرانزٹ گیس پائپ لائن کے تعمیراتی کام کے دوران ایک قدیم رومی بستی غیر متوقع طور پر دریافت ہوئی۔
بلغارین جرنل آف آرکیالوجی میں شائع ہونے والی تحقیق کے مطابق، یہ بستی سریڈنا گورا پہاڑیوں کے مغربی حصے میں 4400 مربع میٹر کے رقبے پر پھیلی ہوئی ہے۔ ماہرینِ آثارِ قدیمہ نے موقع پر پہنچ کر تفصیلی تحقیق کی، جس کے دوران 1500 سال سے زیادہ پرانے برتنوں کے ٹکڑے، سکے اور دیگر قیمتی اشیاء برآمد ہوئیں۔
کھدائی کے دوران ماہرین نے دو عمارتوں کے آثار بھی دریافت کیے، جن کی دیواریں گارے کی اینٹوں سے تعمیر کی گئی تھیں۔ ان عمارتوں میں چھت کے ٹائلز کے ٹکڑے اور ذخیرہ کرنے کے لیے بنائے گئے گڑھے بھی ملے۔ ایک ڈھانچہ تقریباً 30 فٹ لمبا تھا اور اس میں تین کمرے موجود تھے، جبکہ دوسری عمارت دو حصوں پر مشتمل تھی۔
یہ دریافت نہ صرف رومی دور کی تاریخ کو مزید سمجھنے میں مدد دے گی بلکہ اس علاقے میں ماضی کے طرزِ زندگی پر بھی روشنی ڈالے گی۔
