اسلام آباد، بانی پی ٹی آئی عمران خان کی اہلیہ بشریٰ بی بی کی 3 مقدمات میں عبوری ضمانت کی درخواستیں مسترد کردی گئیں۔
سیشن کورٹ اسلام آباد میں بشریٰ بی بی کی ضمانت کی درخواستوں پر سماعت ہوئی۔
ایڈیشنل سیشن جج محمد افضل مجوکہ کی جانب سے عبوری ضمانت کی درخواستوں پر سماعت کی گئی، پراسیکیوٹر اقبال کاکڑ اور وکیل صفائی خالد یوسف چودھری عدالت پیش ہوئے۔
سماعت کے دوران وکیل خالد یوسف چودھری کی جانب سے بشریٰ بی بی کی حاضری معافی کی درخواست دائر کی گئی جس پر پراسیکیوٹر اقبال کاکڑ نے عدالت کو بتایا کہ انہوں نے اپنے ضمانتی مچلکے ہی جمع نہیں کرائے۔
جج افضل مجوکہ نے وکیل صفائی سے استفسار کیا کہ آپ نے ابھی تک ضمانتی مچلکے ہی جمع نہیں کرائے؟ جس پر وکیل خالد یوسف چودھری نے کہا کہ آج 190 ملین پاؤنڈز ریفرنس کا فیصلہ ہے، بشری ٰبی بی نے اڈیالہ جیل جانا ہے۔
عدالت کی جانب سے برہمی کا اظہار کرتے ہوئے کہا گیا کہ آپ عدالتی حکم پر عمل درآمد ہی نہیں کر رہے، آپ کی عبوری ضمانت کی تینوں درخواستیں خارج کی جاتی ہیں۔
یاد رہے کہ سابق خاتون اول بشریٰ بی بی پر 26 نومبر کے احتجاج پر مقدمات درج تھے۔
دوسری جانب تھانہ رمنا میں درج مقدمہ میں عدالت کی جانب سے بشریٰ بی بی کی درخواست ضمانت 23 جنوری تک منظور کر لی گئی۔
