رہنما پاکستان پیپلز پارٹی قمر زمان کائرہ کا کہنا ہے کہ بجلی کے بلز پر ریلیف کی تجویز بہت اچھی بات ہے، ہر صوبائی حکومت کا اپنے لوگوں کو ریلیف دینا حق ہے۔
نجی ٹی وی چینل سے گفتگو کرتے ہوئے رہنما پی پی پی قمر زمان کائرہ کا یہ کہنا تھا کہ ہم وفاقی حکومت کے اتحادی ہیں اور ساتھ چل رہے ہیں،وزرائے اعلیٰ کے بیانات کو بڑھاوا نہیں دینا چاہیے، لفظی گولہ باری سے پرہیز کرنی چاہیے۔
سابق وفاقی وزیر کا یہ کہنا تھا کہ سیاسی رہنماؤں کی گفتگو کو بڑھا چڑھا کر پیش نہیں کرنا چاہیے، سیاسی جماعتوں میں اختلاف ہوتے رہتے ہیں مگر شائستگی کا مظاہرہ بھی اہم ہے۔
قمر زمان کائرہ نے کہا کہ ہر صوبائی حکومت کو وسائل دیکھ کر فیصلے کرنے ہوتے ہیں، صوبوں میں عوام کو حکومتیں ہی ریلیف دیتی ہیں، سندھ حکومت نے ریلیف کے لیے فنڈز اور سہولیات کو دیکھنا ہے۔
سابقہ مشیر وزیراعظم پاکستان نے کہا کہ سندھ حکومت کو بجلی کے بلوں میں تجاویز کا جائزہ لینا ہوگا، سندھ میں بارشوں کی وجہ سے صورتحال تبدیل ہوجاتی ہے۔
قمر زمان کا مزید یہ کہنا تھا کہ ہمارے اِردگرد تلخ ماحول ہے، سیاسی شخصیات کو ذمہ داری کا مظاہرہ کرنا ہوگا۔
