پشاور میں گزشتہ دنوں ہونیوالے ایپکس کمیٹی کے اجلاس کی اندرونی کہانی سامنے آگئی۔
پشاور میں گزشتہ ہفتے ہونیوالے صوبائی ایپکس کمیٹی کے اجلاس کی اندرونی کہانی سامنے آگئی جس میں وزیراعلیٰ خیبر پختونخوا علی امین گنڈاپور، وفاقی وزیرداخلہ محسن نقوی سمیت دیگر اعلیٰ حکام شریک تھے۔
ذرائع کے مطابق ایپکس کمیٹی اجلاس میں وزیرداخلہ محسن نقوی اور وزیراعلیٰ علی امین گنڈاپور کا رویہ دوستانہ رہا۔
ذرائع کے مطابق محسن نقوی نے اجلاس میں کہا کہ قانون نافذ کرنے والے ادارے آپریشن والے علاقوں میں بھی عوام پر تشدد نہیں کرتے، اس پر علی امین گنڈا پور کا کہنا ہے کہ ایسے اہلکاروں کو ڈی چوک میں بھی تعینات کیا جاتا، وزیراعلیٰ کے جواب پر محسن نقوی مسکرائے۔
ذرائع کا بتانا ہے کہ وزیراعلیٰ خیبر پختونخوا نے اجلاس میں کہا کہ دہشتگردی سمیت صوبے کو مختلف مسائل کا سامنا ہے، اس پر وزیر داخلہ کا کہنا ہے کہ وزیراعظم پاکستان سے وفاقی ایپکس کمیٹی کا اجلاس پشاور میں بلانے کی درخواست کروں گا تاکہ تمام مسائل پر وفاقی کمیٹی کے اجلاس میں بات ہوسکے۔
ذرائع کا بتانا ہے کہ وزیراعلیٰ خیبرپختونخوا نے محسن نقوی سے شکوہ کیا کہ بعض پنجاب اور وفاقی وزرا کرم کے مسئلے پر غیر سنجیدہ بیانات دے رہے ہیں، صوبائی حکومت پہلے دن سے مسئلہ حل کرنے میں سنجیدہ ہے، اس پر وزیر داخلہ نے یقین دہانی کرائی کہ وزرا کرم کے مسئلے پر آئندہ ایسے بیانات نہیں دیں گے، مسئلے کے پائیدار حل کے لیے صوبائی حکومت کو سپورٹ کرینگے اور دونوں حکومتیں مل کر کام کریں گی۔
ذرائع کے مطابق وزیراعلیٰ نے وزیرداخلہ سے کہا کہ پولیس کے لیے بلٹ پروف گاڑیوں کا مسئلہ جلد حل کیا جائے، اس پر محسن نقوی نے یقین دہانی کرائی کہ بلٹ پروف گاڑیوں کا مسئلہ ترجیحی بنیادوں پر حل کیا جائے گا۔
