شنگھائی تعاون تنظیم کا 23 واں سربراہی اجلاس آج سے اسلام آباد میں شروع ہوگا۔ جس میں شرکت کیلئے بھارتی وزیر خارجہ جے شنکر بھی پاکستان پہنچ چکے ہیں۔
اسلام آباد میں آج سے شنگھائی تعاون تنظیم (ایس سی او) کا 23واں سربراہی اجلاس شروع ہو رہا ہے، جس میں مختلف ممالک کے اعلیٰ حکام شرکت کر رہے ہیں۔ بھارتی وزیر خارجہ سبرامنیم جے شنکر، ترکمانستان کے ڈپٹی چیئرمین کابینہ راشد مریدوف، تاجکستان کے وزیراعظم خیر رسول زادہ، اور کرغزستان کے وزیراعظم ژاپاروف اکیل بیک سمیت کئی دیگر اہم رہنما اسلام آباد پہنچ چکے ہیں۔ ان کا پرتپاک استقبال نور خان ایئربیس پر پاکستانی حکام نے کیا۔
اجلاس میں میزبان پاکستان کے وزیراعظم شہباز شریف، چین کے وزیراعظم لی چیانگ، بیلاروس، قازقستان، روس، تاجکستان، کرغزستان، ازبکستان کے وزرائے اعظم اور ایران کے اول نائب صدر محمد رضا عارف بھی شرکت کریں گے۔ منگولیا بطور مبصر شرکت کر رہا ہے، جبکہ ترکمانستان مہمان خصوصی کے طور پر شامل ہے۔ اجلاس میں ایس سی او کے سیکرٹری جنرل، تنظیم کے دیگر عہدیداران، اور بزنس و انٹر بینک کونسل کے چیئرمین بھی شریک ہوں گے۔
اجلاس کے دوران مختلف موضوعات بشمول معیشت، تجارت، ماحولیات، اور سماجی و ثقافتی تعلقات پر گفتگو ہوگی، اور رکن ممالک کے درمیان باہمی تعاون کو فروغ دینے کے لیے اہم فیصلے کیے جائیں گے۔ وزیراعظم شہباز شریف نے مہمانوں کے اعزاز میں عشائیہ کا بھی اہتمام کیا ہے۔
