ایس آئی ایف سی کی سہولت کاری اور حکومتی معاشی پالیسیوں کی بدولت پاکستانی ٹیکسٹائل کی برآمدات نے ایک نئے سنگ میل کو عبور کر لیا ہے۔
ایس آئی ایف سی کی سہولت کاری اور حکومتی معاشی پالیسیوں کی بدولت پاکستانی ٹیکسٹائل کی برآمدات نے ایک نئے سنگ میل کو عبور کر لیا ہے، جو 26 ماہ کی بلند ترین سطح پر پہنچ گئی ہیں۔ پاکستان ادارہ شماریات کی رپورٹ کے مطابق، اگست 2024 میں ٹیکسٹائل کی برآمدات میں 13 فیصد اضافہ ہوا اور یہ 1.64 بلین ڈالر تک پہنچ گئیں، جب کہ اگست 2023 میں یہ 1.46 بلین ڈالر تھیں۔
بنگلہ دیش میں سیاسی عدم استحکام اور بین الاقوامی پابندیوں کی وجہ سے چین کی مصنوعات کی طلب میں کمی نے پاکستانی ٹیکسٹائل برآمدات کو فروغ دیا ہے۔ جے ایس گلوبل ریسرچ کی تجزیہ کار شگفتہ ارشاد نے اس پر تبصرہ کرتے ہوئے کہا کہ بنگلہ دیش میں بڑھتی ہوئی لاگت اور سیاسی عدم استحکام نے عالمی کپڑے کے درآمد کنندگان کو پاکستان، بھارت اور ویتنام جیسی متبادل مارکیٹوں کی جانب مائل کیا ہے۔
اس تبدیلی کے باعث، اگست 2024 میں نٹ وئیر اور بیڈ ویئر کی برآمدات میں 15 فیصد اضافہ ہوا، جس کے نتیجے میں پاکستان کی ریڈی میڈ ملبوسات کی برآمدات میں 28 فیصد سال بہ سال اضافہ دیکھنے میں آیا۔
پاکستان کی لسٹڈ ٹیکسٹائل کمپنی "انٹرلوپ لمیٹڈ” اس صورتحال سے خاص طور پر ریڈی میڈ ملبوسات کی برآمدات میں مزید بہتری کی توقع کر رہی ہے، جس کے نتیجے میں کمپنی کے مارجن میں اضافہ اور ملکی معیشت کی مضبوطی ہوگی۔
موجودہ عالمی صورتحال کے تناظر میں، پاکستان کے پاس عالمی منڈی میں اپنے قدم جمانے اور اپنی مصنوعات کے معیار کو بہتر بنا کر برآمدات میں مزید اضافے کا سنہری موقع ہے۔ بلا شبہ، یہ برآمدات میں اضافہ پاکستان کی صنعتی ترقی میں حکومتی اقدامات اور ایس آئی ایف سی کی معاونت کا منہ بولتا ثبوت ہے۔
