اسلام آباد، ایران میں دہشت گردوں کے حملے میں جاں بحق ہونے والے پاکستانیوں کی فہرست جاری کر دی گئی۔
ایران میں پاکستانی سفیر مدثر ٹیپو نے دو روز قبل ایران میں دہشت گردوں کے حملے میں جاں بحق ہونے والے 8 پاکستانی شہریوں کی تفصیلات فراہم کیں۔
پاکستانی سفیر کے مطابق، بہاولپور کے 8 محنت کش ایرانی شہر مہرستان میں دہشت گردی کا نشانہ بنے۔
جاں بحق افراد میں محمد عامر، محمد دلشاد، محمد ناصر، ملک جمشید، محمد دانش، محمد نعیم، غلام جعفر اور محمد خالد شامل ہیں۔
مدثر ٹیپو نے مزید بتایا کہ پاکستانی سفارت خانہ ایرانی حکام کے ساتھ مکمل رابطے میں ہے اور جاں بحق پاکستانیوں کی میتیں جلد وطن واپس بھیجنے کے انتظامات مکمل کیے جا رہے ہیں۔ وزیراعظم اور ڈپٹی وزیراعظم کی ہدایات پر میتیں جلد پاکستان پہنچائیں جائیں گی۔
انہوں نے کہا کہ ایران میں پاکستانی شہریوں کی ہلاکت پر انصاف کے حصول کے لیے مکمل تعاون جاری ہے اور ایرانی حکام سے فوری اور شفاف تحقیقات کے لیے رابطہ کیا جا رہا ہے۔ ایرانی حکومت نے تعاون کی مکمل یقین دہانی کرائی ہے۔
یاد رہے کہ گزشتہ روز ایران کے صوبے سیستان میں دہشت گردوں نے ایک ورکشاپ پر فائرنگ کر کے 8 پاکستانی مکینکس کو قتل کر دیا تھا، مقتولین کا تعلق پنجاب سے تھا۔
