صدر عوامی نیشنل پارٹی ایمل ولی خان کا یہ کہنا ہے کہ سستی بجلی خیبر پختونخوا پروڈیوس کر رہا ہے لیکن 14 روپے فی یونٹ ریلیف پنجاب میں دیا جارہا ہے۔
ایمل ولی خان کا کہنا ہے کہ اگر پختونخوا میں بجلی کی قیمت میں کمی نہ کی گئی تو ہم 1 ماہ بعد وفاقی دارالحکومت اسلام آباد کا رخ کریں گے اور دھرنا دیں گے۔
صدر عوامی نیشنل پارٹی نے کہا کہ جس صوبے میں آئی پی پیز کی بھرمار ہے وہاں ووٹ بینک کی خاطر بجلی کے بلز میں کمی کی جارہی ہے، کے پی کے میں آئی پی پیز سے 1 میگا واٹ بجلی بھی پیدا نہیں ہو رہی تو پھر پختونخوا عوام ان کا بوجھ کیوں برداشت کریں؟
ایم ولی خان کا کہنا تھا کہ پیداواری لاگت کے حساب سے کے پی کے میں بجلی کی قیمت کا تعین صوبے کا بنیادی حق ہے، بجلی اور گیس کی مد میں خیبرپختونخوا کے بقایا جات کی ادائیگی کیلئے وفاقی حکومت ہنگامی طور پر اقدامات کرے۔
یاد رہے کہ 3 روز پہلے صدر مسلم لیگ ن نواز شریف نے وزیراعلیٰ پنجاب مریم نواز کے ساتھ پریس کانفرنس کرتے ہوئے صوبے میں 500 یونٹ تک بجلی استعمال کرنے والوں کو 2 ماہ کیلئے 14 روپے فی یونٹ تک ریلیف دینے کا اعلان کیا تھا۔
وزیراعظم پاکستان شہباز شریف نے بھی وزیراعلیٰ پنجاب کے بجلی کی قیمتوں میں ریلیف کے اقدامات کو سراہا جبکہ وفاقی وزیر اطلاعات و نشریات عطا تارڑ کا یہ کہنا تھا سابق وزیراعظم نواز شریف کو پاکستانی عوام کے درد کا احساس ہے، وہ ہمیشہ عوام کی فلاح کیلئے کام کرتے ہیں۔
