تہران، ایران کے سپریم لیڈر آیت اللہ علی خامنہ ای نے کہا ہے کہ اگر امریکا نے ایران کے خلاف کوئی غیر دانشمندانہ قدم اٹھایا تو اسے بھرپور جواب دیا جائے گا۔
تہران میں جمعہ کے اجتماع سے خطاب کرتے ہوئے آیت اللہ خامنہ ای نے کہا کہ امریکی حکام کو یہ بات سمجھ لینی چاہیے کہ ایران کو دھمکیاں دے کر وہ کوئی فائدہ حاصل نہیں کرسکتے۔
انہوں نے مزید کہا کہ امریکی اور یورپی طاقتیں خطے میں استعماری سازشوں کے خلاف مزاحمت کرنے والی تنظیموں کو ایران کی پراکسی قرار دے کر ان کی توہین کرتی ہیں، جبکہ حقیقت یہ ہے کہ ایران کو کسی پراکسی کی ضرورت نہیں ہے۔
سپریم لیڈر نے زور دیتے ہوئے کہا کہ اگر امریکا نے ایران کے خلاف کسی قسم کی جارحیت کا ارتکاب کیا تو اسے سخت اور فیصلہ کن ردعمل کا سامنا کرنا پڑے گا۔
یاد رہے کہ امریکہ اور ایران کے درمیان تنازعہ کئی دہائیوں پر محیط ہے، جس کی جڑیں تاریخی، سیاسی، اقتصادی اور عسکری معاملات میں گہری ہیں، یہ تنازعہ بنیادی طور پر ایران کے جوہری پروگرام، خطے میں اثر و رسوخ اور امریکہ کی مشرق وسطیٰ میں پالیسیوں سے جڑا ہوا ہے۔
