اسلام آباد، چیئرمین پی ٹی اے حفیظ الرحمان کا کہنا ہے کہ انٹرنیٹ اسپیڈ کم ہونے کے حوالے سے کوئی پالیسی نہیں ہے۔
چیئر پرسن پلوشہ خان کی زیر صدارت سینیٹ کی قائمہ کمیٹی برائے آئی ٹی کا اجلاس ہوا۔ اجلاس میں چیئرمین پاکستان سافٹ ویئر ہاؤسز ایسوسی ایشن (پاشا) کی قائمہ کمیٹی کو آئی ٹی انڈسٹری کے حوالے سے بریفنگ دی گئی۔
چیئرمین پاشا کا کہنا ہے کہ آئی ٹی انڈسٹری 30 فیصد کے حساب سے گروتھ کر رہی ہے اور نیشنل سیکیورٹی کو خطرے کی صورت میں انٹرنیٹ سروس بند ہوسکتی ہے، جسکے باعث تمام ممالک وی پی اینز کو مانیٹر کرتے ہیں۔
چیئرمین پاکستان سافٹ ویئر ہاؤسز ایسوسی ایشن نے وی پی این سروس پروائیڈرز کی تجویز دیتے ہوئے کہا گیا کہ حکومت کے لیے تجویز ہے کہ وی پی اینز کو مقامی سطح پر رجسٹرڈ کرے۔
ان کا کہنا تھا کہ فری وی پی اینز سے ڈیٹا سیکیورٹی کے خطرات ہیں اور انٹرنیٹ آئی ٹی انڈسٹری کے لیے شہ رگ کی حیثیت رکھتا ہے جبکہ موجودہ صورتحال میں 99 فیصد آئی ٹی کمپنیوں کی جانب سے خلل کی نشاندہی کی گئی ہے۔
چیئرمین پاشا کی جانب سے وزارت آئی ٹی کے ساتھ انٹرنیٹ میں خلل کا معاملہ بھی اٹھا دیا گیا۔
سیکرٹری آئی ٹی کے مطابق پی ٹی اے نے آئی ٹی انڈسٹری کے خدشات دور کرنے کے لیے سیل بنایا ہے، نیشنل سیکیورٹی کی صورت میں انٹرنیٹ سروس بند کرتے ہیں۔
