واشنگٹن، امریکی وزارت خارجہ کی ترجمان ٹیمی بروس نے کہا ہے کہ امریکی ویزے کے جائزے کے عمل کی کوئی حتمی ڈیڈ لائن مقرر نہیں کی گئی۔
نیوز کانفرنس کے دوران ترجمان کا کہنا تھا کہ سفری پابندیوں کے حوالے سے آج کوئی آخری تاریخ نہیں، بلکہ اس معاملے پر تحقیقات مکمل ہونے کے بعد تفصیلات جاری کی جائیں گی۔ ان کا مزید کہنا تھا کہ اس امر کو یقینی بنایا جا رہا ہے کہ امریکہ میں داخل ہونے والے غیر ملکی افراد ملک کی قومی سلامتی اور عوامی تحفظ کے لیے خطرہ نہ ہوں۔
ترجمان نے ایران کے حوالے سے کہا کہ تہران کو جوہری ہتھیار تیار کرنے کی اجازت نہیں دی جائے گی، اور صدر ٹرمپ اس پر دباؤ بڑھا رہے ہیں تاکہ وہ دہشت گرد گروہوں کی حمایت ختم کرے۔
ٹیمی بروس نے مزید کہا کہ امریکہ شام کی صورتحال پر گہری نظر رکھے ہوئے ہے اور چاہتا ہے کہ احمد الشرع تمام شہریوں کے حقوق کا احترام کریں، جبکہ امریکی حکومت اپنے شہریوں کے تحفظ کو یقینی بنانے کے لیے پرعزم ہے۔
دوسری جانب ایران کے سپریم لیڈر آیت اللہ علی خامنہ ای نے کہا ہے کہ اگر امریکا نے ایران کے خلاف کوئی غیر دانشمندانہ قدم اٹھایا تو اسے بھرپور جواب دیا جائے گا۔
تہران میں جمعہ کے اجتماع سے خطاب کرتے ہوئے آیت اللہ خامنہ ای نے کہا کہ امریکی حکام کو یہ بات سمجھ لینی چاہیے کہ ایران کو دھمکیاں دے کر وہ کوئی فائدہ حاصل نہیں کر سکتے۔
