اسلام آباد ہائیکورٹ نے ایمان مزاری اور انکے شوہر ہادی علی چٹھہ کے 3 روزہ جسمانی ریمانڈ کا انسداد دہشتگردی عدالت کا فیصلہ معطل کردیا۔
اسلام آباد ہائی کورٹ نے کارِ سرکار میں مداخلت کیس میں ایمان مزاری اور ان کے شوہر ہادی علی چٹھہ کا جسمانی ریمانڈ معطل کر دیا ہے۔ ایکسپریس نیوز کے مطابق، ایمان مزاری اور ان کے شوہر کے تین روزہ جسمانی ریمانڈ کے خلاف درخواست پر سماعت اسلام آباد ہائی کورٹ کے چیف جسٹس عامر فاروق اور جسٹس ثمن رفعت امتیاز نے کی۔
سماعت کے دوران ایمان مزاری کے وکیل قیصر امام عدالت کے سامنے پیش ہوئے اور دلائل دیے کہ درخواست گزاروں کا تین روزہ ریمانڈ واپس لیا جائے۔ عدالتی ہدایت پر وکیل نے ریمانڈ آرڈر پڑھ کر سنایا، جس پر عدالت نے جسمانی ریمانڈ معطل کر دیا اور پولیس کو نوٹس جاری کرتے ہوئے کل تک جواب طلب کر لیا۔
یاد رہے کہ انسداد دہشت گردی کی عدالت نے گزشتہ روز ایمان مزاری اور ان کے شوہر کا تین روزہ جسمانی ریمانڈ منظور کیا تھا، جسے اب اسلام آباد ہائی کورٹ نے معطل کر دیا ہے۔
