غزہ، اسرائیلی فوج نے غزہ میں وحشیانہ بمباری کرتے ہوئے اقوام متحدہ کی پناہ گزین ایجنسی کے طبی مرکز کو نشانہ بنایا، جس کے نتیجے میں 22 بے گناہ فلسطینی شہید ہو گئے، جن میں خواتین اور بچے بھی شامل ہیں۔
خبر ایجنسی کے مطابق بیت حنون اور بیت لاحیہ سے جبری بےدخل کیے گئے فلسطینی ایک عارضی پناہ گزین کیمپ میں رہائش پذیر تھے، جب اسرائیلی فضائی حملے نے انہیں نشانہ بنایا۔
اسرائیلی فوج کی تازہ بمباری میں مجموعی طور پر 80 سے زائد فلسطینی شہید ہو چکے ہیں، جبکہ سینکڑوں زخمی ہیں۔
اسرائیل نے غزہ کے وسیع علاقے پر قبضہ جما لیا اور رفح اور خان یونس کو الگ کرتے ہوئے اس علاقے کو "موراج کوریڈور” کا نام دے دیا۔
اسرائیلی فوج نے لبنان اور شام پر بھی فضائی حملے کیے، جس میں شام کے صوبے دارا میں 11 افراد جاں بحق اور متعدد زخمی ہوئے، جبکہ لبنان میں ہونے والے حملے میں کسی جانی نقصان کی اطلاع نہیں ملی۔
دوسری جانب ہنگری کی حکومت نے بین الاقوامی فوجداری عدالت (آئی سی سی) سے علیحدگی کا اعلان کر دیا۔
یہ فیصلہ ایسے وقت میں سامنے آیا جب ہنگری کے وزیر اعظم وکٹر اوربان، اسرائیلی وزیر اعظم بن یامین نیتن یاہو کے دورے کے استقبال کی تیاری کر رہے تھے۔
