اسلام آباد، جمعیت علمائے اسلام کے سربراہ مولانا فضل الرحمان نے کہا ہے کہ اسرائیلی جارحیت کے خلاف فلسطینیوں کا ساتھ دینا تمام مسلمانوں پر فرض ہے اور ہم اپنے فلسطینی بھائیوں کے ساتھ کھڑے ہیں۔
قومی فلسطین کانفرنس سے خطاب کرتے ہوئے مولانا فضل الرحمان نے کہا کہ غزہ میں جاری بربریت کا سلسلہ انتہائی افسوسناک ہے، انہوں نے کہا کہ آج کا اجتماع ایک عام اجتماع نہیں، بلکہ تاریخ اسے کبھی نظرانداز نہیں کرے گی۔
مولانا فضل الرحمان نے کہا کہ کانفرنس کا اعلامیہ پوری امت مسلمہ کے لیے ہے اور اسرائیل ایک ریاستی دہشت گرد ہے، جس کی تاریخ قتل و غارت سے بھری ہوئی ہے، فلسطین کے معاملے پر پوری قوم متحد ہے۔
انہوں نے کہا کہ نہتے فلسطینیوں پر ظلم و ستم کی تاریخ بے مثال ہے اور اسرائیل ایک دہشت گرد ریاست ہے۔ دنیا کو یہ پیغام دینا چاہتے ہیں کہ پاکستان فلسطینی بھائیوں کے ساتھ ہے۔
مولانا فضل الرحمان نے کہا کہ ہمارے ملک کے کچھ فلاسفر کہتے ہیں کہ اسرائیل کے ساتھ تعلقات بہتر نہ کیے تو معیشت کیسے چلے گی، لیکن ہمیں اس بات کا خوف نہیں ہونا چاہیے۔ پاکستان کا اسرائیل کے بارے میں موقف واضح ہونا چاہیے۔
سربراہ جے یو آئی نے کہا کہ پرویز مشرف نے مجھ سے کہا تھا کہ اگر آپ امریکا کے خلاف جلوس نکالتے ہیں تو ہمیں ماننا ہوگا کہ ہم امریکا کے غلام ہیں۔
