لاہور، صدر مملکت آصف علی زرداری کا کہنا ہے کہ اتحادی حکومت کیساتھ چلنا ہماری مجبوری ہے، جانتا ہوں تحریری معاہدے کے نکات پر عملدرآمد نہیں ہو رہا۔
صدر آصف علی زرداری سے پیپلز پارٹی پنجاب کے پارلیمانی وفد کے ارکان اور تنظیمی رہنماؤں کی جانب سے گورنر ہاؤس لاہور میں ملاقات کی گئی، ذرائع کا بتانا ہے کہ پارٹی رہنماؤں نے آصف زرداری کے سامنے شکایات کے انبار لگا دیے۔
وفد کے ارکان نے کہا کہ انتظامی معاملات میں پیپلز پارٹی کے اراکین کو نظرانداز کیا جاتا ہے، ترقیاتی فنڈز کی تقسیم کے معاملہ میں بھی ترجیح نہیں دی جا رہی، پارلیمانی وفد نے صدر کو حلقوں کے مسائل سے بھی آگاہ کیا۔
صدر سے ملاقات کرنیوالوں میں گورنر پنجاب سردار سلیم حیدر، پیپلزپارٹی کے پارلیمانی لیڈر پنجاب اسمبلی سید علی حیدر گیلانی، سابق گورنر پنجاب مخدوم احمد محمود، ارکان پنجاب اسمبلی سردار ممتاز علی چانگ، ملک واصف مظہر راں، جام رئیس نبیل، رانا اقبال سراج قاضی احمد سعید، میاں کامران عبداللّٰہ مڑل، سید عامر شاہ، حبیب الرحمان چانگ، انعام باری، نرگس فیض ملک، نیلم جبار اور شازیہ عابد شامل ہیں۔
صدر آصف علی زرداری کی جانب سے پارٹی رہنماؤں سے ملاقات کی گئی اور یقین دہانی کرائی کہ ارکان پنجاب اسمبلی کے مسائل کے حوالے سے وزیراعظم شہباز شریف سے بات کروں گا جبکہ پارلیمانی وفد آئندہ بجٹ آنے تک مسائل حل ہونے کا انتظار کریں۔
دوسری جانب وزیراعظم شہباز شریف کا کہنا ہے کہ افغان عبوری حکومت اپنی سرزمین پاکستان کے خلاف استعمال ہونے سے روکے کیونکہ افغانستان میں امن و استحکام خطے کے مفاد میں ہے۔
