راولپنڈی، آرمی چیف جنرل سید عاصم منیر سے امریکی کانگریس کے ایک اعلیٰ سطحی وفد نے جی ایچ کیو میں ملاقات کی۔
آئی ایس پی آر کے مطابق، وفد کی قیادت کانگریس مین جیک برگمین نے کی، جبکہ تھامس سوزی اور جوناتھن جیکسن بھی وفد میں شامل تھے۔
اس ملاقات میں علاقائی سیکیورٹی، دفاعی تعاون اور باہمی دلچسپی کے مختلف امور پر تبادلہ خیال کیا گیا، دونوں جانب سے باہمی احترام، مشترکہ اقدار اور اسٹریٹجک مفادات پر مبنی مسلسل روابط کی اہمیت کو اجاگر کیا گیا۔
ملاقات کے دوران انفارمیشن ٹیکنالوجی کے شعبے میں تربیتی تعاون کے لیے مفاہمتی یادداشتوں پر بھی دستخط ہوئے۔
امریکی وفد نے دہشت گردی کے خلاف پاک فوج کے کردار کو سراہا اور علاقائی امن و استحکام کے لیے پاکستان کی کوششوں کو تسلیم کیا، وفد نے پاکستانی عوام کی ثابت قدمی اور ملک کی تزویراتی صلاحیت کی بھی تعریف کی۔
امریکی وفد نے پاکستان کی خودمختاری کے لیے احترام کا اظہار کیا اور سیکیورٹی، تجارت، سرمایہ کاری اور اقتصادی ترقی کے شعبوں میں دوطرفہ تعاون بڑھانے کے عزم کا اعادہ کیا۔
آرمی چیف نے وفد کے دورے پر ان کا شکریہ ادا کرتے ہوئے کہا کہ پاکستان امریکہ کے ساتھ دیرینہ شراکت داری کو مزید مضبوط اور متنوع بنانے کا خواہاں ہے، جو کہ باہمی مفادات اور قومی خودمختاری کے اصولوں پر مبنی ہو۔
