چیئرمین پاکستان پیپلزپارٹی بلاول بھٹو زرداری کا کہنا ہے کہ 26 ویں آئینی ترمیم کی منظوری کیلئے حکومت اور اتحادیوں کے پاس نمبرز پورے تھے، اور یہ ترمیم سربراہ جے یو آئی (ف) مولانا فضل الرحمان کی حمایت کے بغیر بھی ہو سکتی تھی۔
اسلام آباد: پاکستان پیپلزپارٹی کے چیئرمین بلاول بھٹو زرداری نے کہا ہے کہ 26 ویں آئینی ترمیم کی منظوری کے لیے ہمارے پاس مطلوبہ تعداد پوری تھی۔ برطانوی نشریاتی ادارے کو انٹرویو دیتے ہوئے بلاول بھٹو کا کہنا تھا کہ پارلیمان نے 26 ویں آئینی ترمیم منظور کی، جس کے تحت نئے چیف جسٹس کو مقرر کیا جا چکا ہے۔ انہوں نے کہا کہ 25 اکتوبر سے پہلے 26 ویں آئینی ترمیم کی منظوری ایک بڑا کام تھا۔
بلاول بھٹو نے مزید کہا کہ یہ ترمیم کسی اور چیف جسٹس کی موجودگی میں ممکن نہیں تھی، اور چیف جسٹس قاضی فائز عیسیٰ کو متنازع بنانے کی کوشش کی گئی۔ انہوں نے 9 مئی کے واقعات کا حوالہ دیتے ہوئے کہا کہ فوجی تنصیبات پر حملہ ہوا تھا، اور حکومت ذمہ داروں کا ٹرائل کرنا چاہتی تھی، لیکن عدالت آئین کی تشریح کرتے ہوئے حکومتی فیصلے کی راہ میں رکاوٹ بنی۔
انہوں نے واضح کیا کہ 26 ویں آئینی ترمیم کی منظوری مولانا فضل الرحمان کی حمایت کے بغیر بھی ممکن تھی، کیونکہ ہمارے پاس مطلوبہ نمبرز موجود تھے۔
