پی ٹی آئی، جمعیت علمائے اسلام، پیپلز پارٹی اور مسلم لیگ (ن) نے آئینی ترامیم سے متعلق اپنے مسودے پارلیمیٹ کی خصوصی کمیٹی میں پیش کر دیے۔
خصوصی پارلیمانی کمیٹی کا اجلاس خورشید شاہ کی زیر صدارت ہوا جس میں تمام رہنماؤں کی جانب سے اپنے اپنے مجوزہ آئینی مسودے پر اظہار خیال کیا گیا، پی ٹی آئی، جے یو آئی، پیپلز پارٹی اور ن لیگ کی جانب سے اپنا مسودہ کمیٹی میں پیش کیا گیا۔
وفاقی وزیر رانا تنویر حسین نے اجلاس کے بعد صحافیوں سے گفتگو کے دوران یہ کہا کہ کمیٹی کی کوشش ہوگی کہ تمام جماعتوں کا مؤقف سنا جائے، کوشش ہے کہ اٹھارویں ترمیم کی طرح مشترکہ مسودے پر متفق ہو جائیں۔
اسپیکر قومی اسمبلی سردار ایاز صادق کا میڈیا سے گفتگو کے دوران یہ کہنا تھا کہ میں دعا کرنے جا رہا ہوں کہ بہتری ہو، میں یہ بھی یقین رکھتا ہوں کہ دعاؤں کا بہت بڑا اثر ہوتا ہے، اللہ سے جب رابطہ رکھتے ہیں تو اس میں مزید بہتری ہوتی ہے۔
وزیر قانون اعظم نذیر تارڑ نے کہا کہ آج کمیٹی کے اجلاس میں کافی تجاویز سامنے آئی ہیں، کل کمیٹی کا اجلاس 12 بجے پھر ہو گا، ہیجان کی کیفیت جو پیدا کر رکھی تھی وہ کم از کم ختم ہو گئی ہے۔
