راولپنڈی، پاکستان تحریک انصاف (پی ٹی آئی) کی جانب سے حکومت سے مذاکرات ختم کرنے کا اعلان کر دیاگیا۔
چیئرمین پاکستان تحریک انصاف بیرسٹر گوہر کی جانب سے اعلان کیا گیا کہ حکومت اور پی ٹی آئی کے درمیان جاری مذاکرات ختم کر دیئے گئے۔
اڈیالہ جیل کے باہر میڈیا سے گفتگو کے دوران چیئرمین پی ٹی آئی بیرسٹر گوہر نے کہا کہ آج بانی پی ٹی آئی سے میری اور دیگر وکلاء کی ملاقات ہوئی ہے، عمران خان نے کہہ دیا حکومت آج جوڈیشل کمیشن نہیں بناتی تو مذاکرات ختم کر دیں۔
بیرسٹر گوہر نے کہا کہ پہلے بھی حکومت کو 7 دن کا وقت دیا تھا لیکن اب تک حکومت نے جوڈیشل کمیشن تشکیل نہیں دیا، ہماری خواہش تھی کہ مذاکرات ہوں اور آگے چلیں لیکن شاید سیاسی اختلافات کی ٹھنڈک اتنی زیادہ ہے کہ اس سے برف پگھل نہیں رہی، افسوس کی بات ہے کہ حکومت کی طرف سے آج تک کوئی اعلان نہیں ہوا۔
چیئرمین پی ٹی آئی نے کہا کہ اگر کمیشن کا اعلان نہیں ہوتا تو مذاکرات کے مزید راؤنڈ نہیں ہوں گے، کمیشن بننا ہے تو ارکان سپریم کورٹ یا ہائیکورٹ کے 3 سینئر ججز سے ہونے چاہئیں، 3 ججز پر مشتمل کمیشن بننے کی صورت میں مذاکرات کئے جاسکتے ہیں۔
بیرسٹر گوہر کے مطابق بانی پی ٹی آئی عمران خان کا کہنا ہے کہ ہم آئین اور قانون کے تحت اپنی کوشش جاری رکھیں گے، بانی پی ٹی آئی کی ہدایت پر تمام اپوزیشن جماعتوں کے ساتھ مل کر جدوجہد کریں گے۔
چیئرمین پی ٹی آئی نے کہا کہ بانی پی ٹی آئی عمران خان پہلے بھی کہہ چکے ہیں ہمیں کسی بیرونی مدد کا انتظار نہیں۔
