لندن، پی آئی اے کی پروازوں سے پابندی ہٹانے کے لیے برطانوی پارلیمنٹ میں بھی آوازیں بلند ہونے لگیں۔
پاکستانی نژاد برطانوی ممبر پارلیمنٹ یاسمین قریشی کی جانب سے برطانیہ میں پی آئی اے کی پروازوں سے پابندی ہٹانے کا مطالبہ کردیا گیا، برطانوی ممبر پارلیمنٹ نے محکمہ ٹرانسپورٹ کے سیکرٹری کو مراسلہ لکھ دیا۔
مراسلے کے مطابق یورپی یونین ایوی ایشن ایجنسی نے بھی پی آئی اے سے پابندی ہٹادی ہے، برطانوی محکمہ ٹرانسپورٹ بھی پی آئی اے پر پابندی ہٹائے، براہ راست پروازوں سے برطانیہ میں مقیم پاکستانیوں کو سہولت میسر ہوگی، براہ راست پروازیں نہ ہونے سے ملک کو کافی مشکلات کا سامنا ہے۔
محکمہ ٹرانسپورٹ کو لکھے گئے مراسلہ کے مطابق برطانیہ میں مقیم پاکستانیوں کو اپنے پیاروں کے جسد خاکی پاکستان آبائی علاقوں میں لیجانے کی بھی سہولت میسر آئے گی۔
مراسلے کے مطابق پاکستان سول ایوی ایشن کے حکام کی قابلیت کی وجہ سے یورپ میں پاکستانی ایئرلائنز پر پابندی ہٹانے میں مدد ملی، برطانیہ میں بھی پاکستانی ایئرلائنز کی فوری بحالی کے اقدامات کیے جائیں۔
