پرتگال نے امیگریشن پالیسی میں بڑی تبدیلی کرتے ہوئے غیر قانونی طور پر آنے والے تارکین وطن کو ورک پرمٹ کے لیے درخواست دینے اور ملک میں رہنے کی اجازت دینے والے قانون کو ختم کر دیا ہے۔
پرتگال نے اپنی امیگریشن پالیسی میں بڑی تبدیلی کرتے ہوئے غیر قانونی طور پر آنے والے تارکین وطن کو ورک پرمٹ کے لیے درخواست دینے اور ملک میں رہنے کی اجازت دینے والے قانون کو ختم کر دیا ہے۔ یہ فیصلہ یورپی یونین کے ضوابط کے مطابق کیا گیا ہے، جس کے تحت اب پرتگال میں آنے والے تارکین وطن کو اپنے رہائشی اجازت نامے کے لیے درخواست اپنے ممالک میں موجود پرتگالی سفارت خانے یا قونصل خانے سے دینا ہوگی۔
نائب وزیر برائے امیگریشن، روئی آرمینڈو فریٹاس کے مطابق، اس پالیسی کی تبدیلی کی ضرورت اس لیے پیش آئی کیونکہ سابقہ پالیسی کے باعث یورپ بھر کے غیر قانونی تارکین وطن پرتگال کا رخ کر رہے تھے۔ اس کے نتیجے میں پرتگالی امیگریشن ایجنسی میں درخواستوں کا بیک لاگ بڑھ کر 4 لاکھ تک پہنچ گیا تھا، جن میں سے کچھ درخواستیں دو سال پرانی تھیں۔ انہوں نے مزید کہا کہ ان درخواستوں کی پراسیسنگ آئندہ جون تک مکمل کرنے کا منصوبہ ہے۔
دوسری جانب، غیر سرکاری تنظیموں نے اس تبدیلی کو تارکین وطن مخالف دائیں بازو کی جماعتوں کے دباؤ کا نتیجہ قرار دیا ہے۔ یہ تبدیلی ان تارکین وطن کے لیے خاص طور پر مشکلات کا باعث بن رہی ہے جو ان ممالک سے ہیں جہاں پرتگالی سفارت خانے یا قونصل خانے موجود نہیں، جیسے نیپال اور بنگلہ دیش۔ ایسے افراد کو اب نئی دہلی میں موجود پرتگالی سفارت خانے سے اپنے ویزے کے لیے درخواست دینی پڑے گی۔
پرتگال کی معیشت کا انحصار بڑی حد تک ان تارکین وطن مزدوروں پر ہے، جو زراعت، ہوٹلنگ، اور تعمیراتی شعبے میں اہم کردار ادا کرتے ہیں۔ یہ مزدور زیادہ تر ایشیائی ممالک سے آتے ہیں اور زیتون کے کھیتوں میں کم اجرت پر کام کرتے ہیں، جبکہ برازیلین شہری ہوٹلوں اور کیفے میں کام کرتے ہیں، اور افریقی کارکن تعمیراتی شعبے میں مصروف ہیں۔
نئی پالیسی کے تحت، حکومت کا مقصد تارکین وطن کی تعداد کم کرنا نہیں، بلکہ اس عمل کو بہتر قواعد و ضوابط کے تحت منظم کرنا ہے تاکہ انتہا پسند عناصر اس معاملے کو سیاسی مفاد کے لیے استعمال نہ کر سکیں۔
