پشاور، وزیراعلیٰ خیبر پختونخوا علی امین گنڈاپور کی جانب سے 2 سابق وزرا کامران بنگش اور تیمور جھگڑا کو کابینہ میں شامل نہ کرنے کا فیصلہ کرلیاگیا۔
ذرائع کا بتانا ہے کہ وزیراعلیٰ علی امین گنڈاپور نے خیبر پختونخوا کے سابق وزرا کامران بنگش اور تیمور جھگڑا کو کابینہ میں شامل نہ کرنے کے فیصلے پر بانی پی ٹی آئی کو رضامند کرلیا ہے۔
نجی ٹی وی چینل پر گفتگو کے دوران سابق وزیر خزانہ خیبر پختونخوا تیمور سلیم جھگڑا کا کہنا ہے کہ یہ اندرونی معاملہ ہے، اس پر کوئی تبصرہ نہیں کرسکتا، میں کچھ کہوں گا تو بانی پی ٹی آئی کے مقصد کو نقصان پہنچے گا۔
تیمور جھگڑا نے کہا کہ میں ساتھیوں کی پیٹھ میں چھرا گھونپنے پر یقین نہیں رکھتا، عمران خان نے مجھے پہلی پی ٹی آئی حکومت میں 2 بڑی وزارتیں دی تھیں اور اب بھی انہوں نے مجھے بلایا تھا لیکن ملاقات کی اجازت نہیں دی گئی۔
دوسری جانب مشیر اطلاعات خیبرپختونخوا بیرسٹر محمد علی سیف کا اس بارے میں کہنا تھا کہ یہ پارٹی کا اندرونی معاملہ ہے اور اندرونی معاملے پر میڈیا پر کوئی بات کہنا ضروری نہیں۔
ذرائع کے مطابق سابق وزیراعظم عمران خان نے کچھ عرصے پہلے علی امین کو کامران بنگش اور تیمور جھگڑا کو کابینہ میں شامل کرانے کا کہا تھا اور اس حوالے سے پارٹی کے سینئر رہنماؤں نے وزیراعلیٰ خیبرپختونخوا کو عمران خان کا پیغام پہنچایا تھا۔
