اسلام آباد، چیئرمین وزیراعظم یوتھ پروگرام رانا مشہود احمد خان کا کہنا ہے کہ موجودہ حکومت نے مشکل معاشی حالات میں آئی ایم ایف جیسے پیچیدہ مسائل کو بھی کامیابی سے ڈیل کیا ہے۔
رانا مشہود احمد خان کا کہنا ہے کہ جب وزیراعظم پاکستان شہباز شریف کی جانب سے وزارت عظمیٰ کا منصب سنبھالا گیا تو انہوں نے مزار قائد پر حاضری دیتے ہوئے اس عزم کا اظہار کیا تھا کہ وہ ملک کو ترقی کی راہ پر گامزن کریں گے اور بین الاقوامی لیول پر ملک کا وقار بحال کریں گے۔
چیئرمین وزیراعظم یوتھ پروگرام کا کہنا تھا کہ اپنے تجربے، مدبرانہ سوچ اور انتھک محنت سے وزیراعظم نے نہ صرف اقوام متحدہ جیسے بین الاقوامی فورمز پر پاکستان اور امت مسلمہ کی زبردست نمائندگی کی بلکہ مشکل معاشی حالات میں بھی آئی ایم ایف جیسے پیچیدہ مسائل کو حل کیا۔
رانا مشہود کا کہنا تھا کہ آج معیشت کی بہتری اور سفارتی میدان میں کامیابیاں جیسے پاکستان میں ایس سی او کانفرنس کا انعقاد اور سعودیہ، چین اور روس کیساتھ اہم معاہدے وزیراعظم کی مدبرانہ قیادت کا ثبوت ہیں۔
دوسری جانب وزیراعلیٰ سندھ مراد علی شاہ کا کہنا ہے کہ 26 ویں آئینی ترمیم میں کوئی خرابی نظر نہیں آرہی۔
کراچی میں ایک تقریب سے گفتگو کے دوران وزیراعلیٰ سندھ مراد علی شاہ کا کہنا ہے کہ 26 ویں آئینی ترمیم میں کوئی خرابی نظر نہیں آرہی، اگر کوئی ہے تو بتائیں۔
وزیراعلیٰ سندھ کا کہنا تھا کہ اگر کوئی 27 ویں آئینی ترمیم آرہی ہے تو اس کے خدوخال کا علم ہی نہیں ہے۔
