سابق وزیر اعلیٰ سندھ سید قائم علی شاہ کے زندہ بیٹے کو سرکاری ریکارڈ میں مردہ قرار دے دیا گیا۔
خیرپور: سابق وزیر اعلیٰ سندھ سید قائم علی شاہ کے بیٹے ڈاکٹر سید لیاقت علی شاہ کو سرکاری دستاویزات میں غلطی سے مردہ قرار دے دیا گیا، جس پر عدالت نے نوٹس لے لیا۔
ڈاکٹر سید لیاقت علی شاہ خیرپور کے سرکاری آنکھوں کے اسپتال (SIOVS) میں کنٹریکٹ پر انچارج کے طور پر خدمات انجام دے رہے ہیں اور ماضی میں محکمہ صحت میں 161 سے زائد ملازمین کی بھرتی کر چکے ہیں۔
محکمہ صحت کے اعلیٰ حکام نے ایک کیس کی رپورٹ ایڈیشنل رجسٹرار کے ذریعے عدالت میں پیش کی، جس میں انہیں متوفی ظاہر کیا گیا۔ یہ حیران کن انکشاف سندھ ہائی کورٹ سکھر بینچ میں ہوا، جس پر عدالت نے فوری کارروائی کرتے ہوئے انکوائری رپورٹ طلب کر لی۔
اس معاملے پر سیکرٹری صحت، ڈی جی صحت اور ایڈیشنل سیکریٹری صحت نے بھی رپورٹ کی تصدیق کی۔ عدالت نے اس غلطی کی تحقیقات کا حکم دیتے ہوئے متعلقہ افسران کے خلاف ممکنہ کارروائی کا عندیہ دیا ہے۔
